Bishkek shahrida boʻlib oʻtayotgan “Markaziy Osiyo mamlakatlari parlamentlari: mintaqani har tomonlama rivojlantirish boʻyicha samarali yechimlar” mavzusidagi III parlamentlararo forumda yoshlar bandligini taʼminlash hamda sunʼiy intellekt sohasida huquqiy bazani takomillashtirish masalalari atroflicha muhokama qilindi.

Forumda yoshlar bandligini taʼminlash, mehnat bozorida teng imkoniyatlarni yaratish, taʼlim va kasbga yoʻnaltirish tizimini yanada takomillashtirish masalalariga alohida eʼtibor qaratildi.

Shuningdek, raqamli suverenitet, kiberxavfsizlik, shaxsiy maʼlumotlarni himoya qilish, Internetdagi tahdidlardan yoshlarni asrash borasida qoʻshma harakatlarni kuchaytirishga doir takliflar bildirildi.

Muhokama davomida sunʼiy intellekt texnologiyalarining davlat boshqaruvi, iqtisodiyot, taʼlim va sogʻliqni saqlash sohalaridagi oʻrni va imkoniyatlari haqida ham fikr almashildi.

Taʼkidlanganidek, sunʼiy intellekt bilan bogʻliq huquqiy bazani shakllantirish, inson huquqlari va axloqiy meʼyorlar bilan uygʻunlashgan qonunlarni qabul qilish bugungi kunning dolzarb vazifalaridan sanaladi. Qator davlatlar bu borada amaliy qadamlarni boshlagan boʻlib, mintaqaviy hamkorlik orqali mazkur sohadagi tajriba almashuvi muhim ahamiyatga ega.

Forum yakuni boʻyicha Markaziy Osiyo davlatlarining parlamentlararo hamkorligi va tashabbuslarining yoʻnalishlari belgilab berilgan Bishkek deklaratsiyasi qabul qilindi.