TASS xabariga koʻra, Gʻazo sektorini minalardan tozalash va portlamagan snaryadlarni yoʻq qilish jarayoni 20–30 yilgacha davom etishi mumkin.

BMT homiyligida faoliyat yuritayotgan xalqaro nodavlat tashkilot vakilining soʻzlariga koʻra, “Gʻazo hududi haqiqiy mina maydoniga aylangan, Isroil hujumlari natijasida qolgan portlamagan bombalar va snaryadlarni yoʻq qilish oʻnlab yillar talab etadi”.

Uning taʼkidlashicha, Gʻazodagi barcha portlamagan oʻq-dorilarni zararsizlantirish imkonsiz, chunki ularning koʻpi yer ostining chuqur qatlamlarida joylashgan.

— Faqat yer yuzasida joylashgan portlovchi moddalarni topish va zararsizlantirishning oʻzi butun bir avlod vaqtini oladi, — dedi u.

Manbaga koʻra, Isroil hukumati Gʻazo hududiga zararsizlantirish uchun zarur texnik uskunalarni olib kirishga ruxsat bermayapti. Shuningdek, NNTlar snaryadlarni portlatmasdan, ularni xavfsiz tarzda yoʻq qilish uchun moʻljallangan maxsus uskunalarni olib kirish iznini ham ololmagan.

Avvalroq xalqaro nodavlat tashkilot Handicap International maʼlum qilganidek, 2023-yil oktyabridan beri davom etayotgan harbiy harakatlar vaqtida Isroil kuchlari Gʻazo sektoriga taxminan 70 ming tonna snaryad va bomba tashlagan.