Oʻzbekiston Respublikasi Prezidenti Shavkat Mirziyoyevning “Bolalarni ijtimoiy himoya qilish tizimini yanada takomillashtirish chora-tadbirlari toʻgʻrisida”gi 185-sonli Farmoni qabul qilindi.

Farmonga koʻra, 2025-yil 1-yanvardan boshlab, bir qator ishlar yoʻlga qoʻyiladi. Birinchidan, mehribonlik uylari va bolalar uylariga kam taʼminlangan oilalarning farzandlarini vaqtinchalik qabul qilish tartibi bekor qilinadi.

Ikkinchidan, yetim va ota-ona qaramogʻidan mahrum boʻlgan yoshlarga taʼlim olish, bandligini taʼminlash, davolanish hamda uy-joy sharoitlarini yaxshilash uchun ijtimoiy yordam koʻrsatiladi.

Uchinchidan, tutingan ota-onalarni tayyorlash kurslariga yetim bolalar va ota-ona qaramogʻidan mahrum boʻlgan bolalarni farzandlikka olish istagini bildirgan nomzodlar ham qamrab olinadi.

Toʻrtinchidan, bosqichma-bosqich Andijon viloyati, Toshkent shahri hamda Samarqand viloyatida kichik hajmli bolalar uyi tashkil etiladi.

Beshinchidan, “Mehr daftari” jamgʻarmalari tugatiladi.

Shuningdek, 2025-yil 1-fevraldan boshlab farzandini tarbiyalashdan voz kechmoqchi boʻlgan onalar, shu jumladan, homilador ayollar uchun bolalar uylarida “Onalar maskani” xizmati yoʻlga qoʻyiladi.

“Onalar maskani”da onalar va ularning bolalari (4 yoshga toʻlmagan) 1-yilgacha boʻlgan muddatga ijtimoiy shartnoma asosida vaqtincha boshpana bilan taʼminlanadi. Shuningdek, ijtimoiy, huquqiy, psixologik va tibbiy xizmatlar koʻrsatiladi, onalik va kasbiy koʻnikmalar shakllantiriladi.

Bundan tashqari, onalarning kasb-hunar egallashi va bandligini taʼminlashga koʻmaklashadi.