Ijtimoiy tarmoqda Kadastr agentligi Fargʻona viloyati hududiy boshqarmasi boshligʻi yigʻilishda xodimlarini haqoratlagani tasvirlangan video tarqaldi. Ushbu holat Kadastr agentligining odob-axloq komissiyasi tomonidan atroflicha oʻrganib chiqildi. 

Kadastr agentligining maʼlum qilishicha, ushbu holat joriy yilning 3-may kuni Kadastr agentligi Fargʻona viloyati boshqarmasi hamda boʻlim boshliqlari ishtirokida hududda yer uchastkalarini oʻzboshimchalik bilan egallash va ulardan noqonuniy foydalanish holatlarini aniqlash, bartaraf etish boʻyicha belgilangan vazifalarni ijrosini bajarilishi hamda yuridik va jismoniy shaxslar tomonidan yuborilgan murojaatlarni oʻz vaqtida sifatli koʻrib chiqish boʻyicha oʻtkazilgan tahliliy, tanqidiy yigʻilish jarayonida sodir boʻlgan.

Boshqarma boshligʻi yigʻilish davomida xodimlar tomonidan yoʻl qoʻyilgan kamchiliklarni tahlil qilish vaqtida asablarini jilovlay olmagan.

Agentlik tomonidan boshqarma boshligʻiga nojoʻya soʻzlarni ishlatgani uchun “hayfsan” intizomiy jazo chorasi qoʻllanildi hamda tushuntirish ishlari olib borildi.

“Bunday holatlarni oldini olish va bu kabi xatoga yoʻl qoʻyilmaslik yuzasidan tizimdagi barcha tashkilot va hududiy boshqarmalari boshliqlari hamda ularning oʻrinbosarlari bilan tushuntirish ishlari olib borildi”, deyiladi agentlik xabarida.

Kadastr agentligining qoʻshimcha qilishicha, bu kabi holatlarni oʻz holiga tashlab qoʻymaydi. Xodimlarning ishchanlik kayfiyatiga hamda mehnat samaradorligiga taʼsir qilishi mumkin boʻlgan holatlar jiddiy nazoratga olinadi hamda qonunchilikda belgilangan tartibda jazo choralari qoʻllaniladi.