Xalqaro atom energiyasi agentligi (MAGATE) bosh direktori Rafael Grossining taʼkidlashicha, Eron boyitilgan uran zaxirasining deyarli barchasini saqlab qolgan. Uning soʻzlarini “Kommersant” keltirdi.

Grossining aytishicha, Isroil va AQSH tomonidan amalga oshirilgan hujumlarga qaramay, 60%gacha boyitilgan uranning deyarli barchasi hanuz Eronda saqlanmoqda.

“Zarar juda katta boʻldi, biroq baholarimizga koʻra, 60 foizgacha boyitilgan uranning katta qismi, agar hammasi boʻlmasa, shuningdek 20%, 5% va 2%gacha boyitilgan material hamon u yerda. Bu material oʻsha yerda qolmoqda va biz uni aniq bir yakuniy maqsad bilan bogʻlamagan boʻlsakda, mazkur darajada — qurolsozlik darajasiga yaqin boyitilgan materialning mavjudligi oʻziyoq jiddiy xavotir uygʻotadi”, — dedi u.

Qayd etilishicha, Eron hukumati hali-hanuz MAGATE inspektorlarini mamlakatning eng muhim yadroviy obyektlari — Fordo, Natanz va Isfahon majmualariga kiritmagan.

Eslatib oʻtamiz, iyun oyida Isroil Eronning yadroviy va mudofaa infratuzilmasiga qarshi harbiy operatsiya oʻtkazgan edi. AQSH ham operatsiyaga qoʻshilib, Fordo, Natanz va Isfahondagi obyektlarga zarbalar bergan.

AQSH rasmiylari oʻshanda Eron yadroviy dasturi “butunlay ishdan chiqqani”, boyitilgan uran esa Eron ilmiy markazlarining vayronalari ostida qolib ketgani haqida bayonot bergan edi.