Saminjon HUSANOV/“Xalq soʻzi”. Buloqboshi tumanida aholining kuz-qish mavsumidagi elektr energiyasi taʼminoti bilan bogʻliq muammolar ijobiy yechim topadi. Buning uchun “Buloqboshi” podstansiyasida transformatorlarni yangilash ishlari olib borilmoqda.

— Bu podstansiya shu kungacha 2,5 megavolt-amper quvvatida ishlayotgan edi, — deydi “Andijon magistral elektr tarmoqlari” AJ xodimi Alijon Rahimov. — Soʻnggi yillarda aholi sonining ortishi natijasida isteʼmolchilar ehtiyojini qondira olmay qoldi. Bu esa kuz-qish mavsumida taʼminotdagi uzilishlarga sabab boʻlayotgandi. Endilikda 16 megavolt-amper kuchlanishdagi yangi transformatorlar ishga tushirilmoqda. Bu bilan 11 ming 400 ta xonadonlar va 522 ta korxona-tashkilotlarni sifatli elektr energiyasi bilan taʼminlashga erishiladi.

Bu kabi jarayon Andijon viloyatining boshqa hududlarida ham davom etmoqda. Jumladan, ayni paytda Andijon shahridagi “Yoyilma”, Asaka tumanidagi “Asaka”, Xoʻjaobod tumanidagi “JFK-O” podstansiyalarida ham taʼmirlash va bunyodkorlik ishlari olib borilyapti. Boʻston va Ulugʻnor tumanlarida 506 milliard soʻmlik loyiha asosida yangi podstansiyalar qurilyapti. Xulosa qilish mumkinki, elektr taʼminotida tub oʻzgarishlar yuzaga kelmoqda.