Yaqinda “BCT Cluster” va “TCT Cluster” klasterlari rahbari, senator Murtazo Rahmatov “Xalq soʻzi onlayn”ga bergan intervyusida paxtani ekishdan tortib, xom ashyoni chuqur qayta ishlashga qadar boʻlgan “zanjir”li jarayon afzalliklari haqida soʻzlab bergandi. U Buxoroda beshta fabrikadan iborat toʻqimachilik majmuasi ishga tushishi bilan yuqori qoʻshimcha qiymatga ega mahsulotlar tayyorlashga kirishilganini taʼkidlagan va korxonaning savdo tarmoqlarini foydalanishga topshirish tadbirlari koʻrilayotganini taʼkidlagan edi.

Nihoyat, koʻplar orziqib kutgan kun keldi. Buxoro shahrida korxonaning B Jeans doʻkoni ish boshladi.Shu munosabat bilan tantanali marosim oʻtkazildi.

— B Jeans– bu “Bukhara Cotton Textile” QK MCHJ (BCT) tomonidan ishlab chiqarilgan yangi mahalliy jinsi brendi sanaladi, — deydi mazkur korxona rahbari O. Jumayev. — Biz ochilish marosimida yigʻilgan ushbu doʻkon mamlakatimizdagi ikkinchi savdo tarmogʻi hisoblanadi. Kelgusida doʻkonlar tarmogʻini kengaytirib, mamlakatimizning boshqa viloyatlarida, shuningdek yaqin va uzoq xorijning yirik shaharlarida bir qator filiallarni ochishni rejalashtirganmiz.

Aytish joizki, BCT korxonasi eng soʻnggi rusumdagi zamonaviy texnologiyalar bilan jihozlangan. Ularni montaj qilish, ishlatishda xorijiy mutaxassislar bilan bir qatorda mahalliy yosh kadrlarning hissasi katta. Muhandis Maʼmurjon Isroilov ana shularning biri.

— Belgiya, Germaniya kabi davlatlardan sotib olingan zamonaviy uskunalarni montaj qilish ishlarida qatnashib, katta tajriba toʻpladim, — deydi u. — Bugun esa mehnatimiz samarasini koʻrib, gʻururlanib turibman. Bizda tayyorlanayotgan jinsi kiyim-kechaklar jahon andazalari darajasida. Qarang, oʻzimizning dalada yetishtirilgan paxtani chuqur qayta ishlash asnosida ana shunday xaridorgir mahsulotlar tayyorlanmoqda. Aytmoqchi, B Jeans doʻkonining dastlabki xaridorlaridan biri boʻldim. Juda xursandman. Savdo tarmogʻida 85 turdagi jinsi kiyim-kechaklar sotuvga qoʻyilgan.

Tadbirda korxonadagi ish jarayoni, kelgusidagi rejalar toʻgʻrisida soʻz yuritildi, savdo tarmogʻi imkoniyatlari bilan tanishildi.
Istam IBROHIMOV,
“Xalq soʻzi”