Abdulaziz YOʻLDOSHEV/“Xalq soʻzi”. Samarqandlik Gulhayo Anorova joriy yilda Zulfiya nomidagi Davlat mukofotiga sazovor boʻldi. U bugungi kunda Samarqand shahar “Inson” ijtimoiy xizmatlar markazi 63-hudud 1-uchastka “Vatanparvar” mahallasida kompleks ijtimoiy xizmat koʻrsatuvchi xodim boʻlib ishlaydi. Gulhayoning 2022-yilda Oʻzbekiston Yozuvchilar uyushmasi tomonidan “Aks-sado” nomli sheʼriy kitobi chop etilgan. Oʻtgan yili “Akademnashr”ning “Izlam” rukni ostida “Avron” nomli sheʼriy toʻplami nashrdan chiqdi. U faolligi, izlanuvchanligi, tashabbuskorligi bilan yoshlar va aholi oʻrtasida hurmat qozonib, nufuzli sheʼriyat bayramlarida faxrli oʻrinlarni egallab kelmoqda.

— 2018-yilda Oʻzbekiston Yoshlar ishlari agentligi qoshidagi yosh ijodkorlar kengashi tomonidan oʻtkazilgan “Samarqand sheʼr oqshomlari” turkiy tilli yoshlar anjumanida faol qatnashib, sertifikat bilan taqdirlandim. “Zomin” respublika yosh ijodkorlari seminari ishtirokchisiman, — deydi Gulhayo Anorova. — 2023-yilda Qozogʻiston Respublikasida sheʼriyat yoʻnalishi boʻyicha oʻtkazilgan anjumanda “Altinsarin belgisi” koʻkrak nishoni bilan taqdirlandim. 2024-yilda ham ushbu mamlakatda sheʼriyat boʻyicha oʻtkazilgan “Jas Ulan” koʻrik-tanlovida ham qatnashdim. Shu yutuqlarim yuksak darajada eʼtirof etilib, Prezidentimiz tomonidan “Zulfiya” nomidagi Davlat mukofotiga loyiq koʻrilganimdan minnatdorman.

Gulhayoning sheʼrlarida yurt goʻzalliklari, doʻstlik va sadoqat tuygʻulari kuylanadi. U maʼnaviy-maʼrifiy tadbirlardagi faolligi, tashabbuskorligi bilan tengdoshlaridan ajralib turadi.