Foto: Reuters

Oq uy HAMASning Gʻazo boʻyicha oʻt ochishni toʻxtatish haqidagi soʻnggi taklifini “yutuq” deb atadi. Bu haqda “The Guardian” nashri xabar berdi.

AQSHning yuqori martabali mulozimining aytishicha, taklif bir necha kun oldin olingan va prezident Jo Bayden hamda Isroil bosh vaziri Binyamin Netanyahu oʻrtasidagi muloqot chogʻida batafsil muhokama qilingan.

Biroq amaldor kelishuvni yakunlash va amalga oshirish qiyin kechishi mumkinligini qayd yetgan. Netanyahu “HAMAS” taklifini xavfsizlik kabineti bilan muhokama qilmoqchi va AQSH, Misr hamda Qatar vositachilari bilan muzokaralar olib borish uchun Dohaga guruh yuborishi mumkin.

Qayd etilishicha, Isroil delegatsiyasiga “Mossad” rahbari Devid Barnea boshchilik qiladi. Oq uy ushbu muzokaralar juma kuni boshlanishiga umid qilmoqda. AQSHning yuqori martabali mulozimining taʼkidlashicha, tuzilma mavjud boʻlsada, kelishuvni yakunlash boʻyicha, ayniqsa, amalga oshirish bosqichlari boʻyicha katta ish qolmoqda.

Taklif etilayotgan kelishuvning birinchi bosqichi “HAMAS”ning olti haftalik sulh davomida garovga olingan keksalar, kasallar va ayollarni ozod qilishi, Isroil Gʻazo shaharlarini tark etishi va falastinlik mahbuslarni ozod qilishidan iborat.

Ikkinchi bosqichda qolgan barcha garovga olinganlar ozod qilinadi, harbiy harakatlar butunlay toʻxtatiladi va Isroil Gʻazodan toʻliq chiqib ketadi. Uchinchi bosqichda Gʻazoni qayta qurish boshlanadi.

Avvalroq, Falastinni qoʻllagan senatorning vazifasidan chetlatilishi Avstraliyada norozilik keltirib chiqargani haqida xabar bergandik.