27-iyul kuni Fransiya poytaxtida boʻlib oʻtayotgan Olimpiada oʻyinlarida qatnashadigan oʻzbekistonlik sportchilar roʻyxati maʼlum boʻldi.

Ushbu bahslar telekanallarda soat 13:00 dan keyin efirga uzatila boshlaydi. Bu vaqtda Doston Roʻziyev va Halimajon Qurbonova dzyudo boʻyicha tatamiga chiqishadi.

13:15 dan boshlab Anna Prakaten ishtirokidagi akademik eshkak eshish boʻyicha musobaqalar boshlanadi. Anastasiya Zelinskaya esa 14:12 da suzish bahslarida kurashga qoʻshilishi, ayni shu sport turida qatnashayotgan yurtdoshimiz Ilya Sibirsev esa 14:45 da bahslarga kirishishi maʼlum boʻlgan.

Velosport sport turi boʻyicha 17:30 dan boshlab Olga Zabelinskayani koʻrishimiz mumkin boʻladi. Oʻzbek boksining yorqin vakilalaridan hisoblangan Nigina Oʻktamova esa kechki dasturlarda ringga koʻtariladi. Dastlabki maʼlumotlarga qaraganda 19:00 da misrlik Yomna Ayadga qarshi jang qiladi.

Birinchi turdagi magʻlubiyatdan soʻng har bir oʻyinni finalga aylantirishga vaʼda berayotgan Oʻzbekiston Olimpia terma jamoasi 20:00 da Misr bilan kuch sinashadi.

Kunni oʻzbek sport gimnastikasi ustalari yakunlab beradi. 23:00 dan boshlanadigan bahslarda Rasuljon Abdurahmonov, Xabibullo Ergashev va Abdullo Azimov ishtirok etishi rejalashtirilgan.

“Xalq soʻzi” sportchilarimizga muvaffaqiyat tilaydi.