Фото: Reuters

Украина президенти Владимир Зеленский АҚШ президенти Дональд Трампга мамлакатнинг АҚШдаги элчисини алмаштиришга ваъда берди. Бу ҳақда икки мустақил манба — «Financial Times» ва «Bloomberg» хабар бермоқда.

Нашрларнинг ёзишича, президентлар телефон орқали Украинанинг АҚШдаги элчиси Оксана Маркаровани алмаштиришга келишиб олган. Келажакда улар алмаштириш учун потенциал номзодларни биргаликда муҳокама қилишни режалаштирмоқда. Украинанинг «Суспильне» нашрига кўра, Зеленский Маркаровани ишдан бўшатиш нияти ҳақида хабардор қилган.

Таъкидланишича, Маркарова Трампнинг Конгрессдаги кўплаб иттифоқчилари томонидан демократларга ҳаддан ташқари яқинлиги учун танқид қилинган. Унинг ўрнига тайинланадиган дипломат Зеленскийнинг Трамп маъмурияти билан ҳамкорликни йўлга қўйишга қаратилган қадами бўлиши мумкин.

Шу ўринда «Financial Times» нашри жараёнда иштирок этаётган украиналик юқори мартабали амалдорнинг фикрларини келтирган. «Зеленский ҳам Оқ уй, ҳам Конгресс учун тушунарли бўлган яхши музокарачини элчи этиб тайинламоқчи. Ушбу дипломатик ўзгаришлар Украинада уруш бошланганидан бери кейинги ҳафта кутилаётган вазирлар маҳкамасидаги энг катта ўзгаришларнинг мантиқий давоми бўлади», деган сиёсатчи.

«Bloomberg» хабарига кўра, Киевнинг Вашингтондаги элчиси лавозимига потенциал номзодлар орасида бош вазир Денис Шмихал, мудофаа вазири Рустем Умеров, Европа интеграцияси вазири Ольга Стефанишина ва энергетика вазири Херман Галушченко бор.