Фото: Reuters

АҚШ Украинага хавфсизлик кафолатлари беришда иштирок этади. Бу ҳақда 18 август куни Вашингтонда бўлиб ўтган учрашувда маълум қилинди.

Оқ уйда президент Дональд Трамп Украина раҳбари Владимир Зеленскийни қабул қилди. Зеленский билан бирга Британия ва Италия бош вазирлари Кир Стармер ҳамда Жоржа Мелони, Германия канцлери Фридрих Мерц, Финляндия ва Франция президентлари Александр Стубб ва Эммануэль Макрон, НАТО бош котиби Марк Рютте ҳамда ЕИ комиссияси раиси Урсула фон дер Ляйен ҳам ташриф буюрди.

Учрашувда Трамп АҚШ Россия–Украина урушига нуқта қўйиш бўйича келишувда қатнашишини, бунда хавфсизлик кафолатлари Европа давлатлари билан ҳамкорликда таъминланишини таъкидлади.

Зеленский эса уруш тўхтаса, хавфсиз шароитда сайлов ўтказишга тайёрлигини билдирди.

Кейинроқ Трамп Truth Socialʼда музокаралар якуни бўйича фикр билдириб, «бу тўрт йилдан бери давом этаётган урушни тугатиш йўлида муҳим биринчи қадам бўлди», дея таъкидлади.

Музокаралар якунида Трамп Россия президенти Владимир Путин билан телефон орқали суҳбатлашди, Зеленский ва Путин ўртасидаги учрашувга тайёргарлик бошланди. Германия канцлери Мерцнинг айтишича, ушбу учрашувни икки ҳафта ичида ўтказиш режалаштирилган.

Шундан сўнг Трамп Россия ва Украина президентлари иштирокида уч томонлама музокаралар ўтказишни мақсад қилмоқда.

Россия президенти ёрдамчиси Юрий Ушаковга кўра, Путин ҳам Украина билан тўғридан-тўғри музокараларни қўллаб-қувватлаган.