АҚШ президенти Дональд Трамп Канада Хитой билан савдо келишуви тузган тақдирда, барча Канада товарларига 100 фоизлик бож жорий этишини маълум қилди. Бу ҳақда у Truth Social ижтимоий тармоғида ёзди.

Трампнинг фикрича, Канада бош вазири Марк Карни (Трамп ўз постида уни «губернатор» деб атаган) агар «Канадани Хитой товарлари учун ўтказувчи нуқтага айлантира оламан» деб ўйлаётган бўлса, «жуда қаттиқ адашмоқда».

«Хитой Канадани тириклайин ютиб юборади, уни бутунлай ўз ичига олади — бизнесни, ижтимоий тузилмани ва умуман турмуш тарзини йўқ қилади. Агар Канада Хитой билан битим тузса, АҚШга кириб келадиган барча канадалик товар ва маҳсулотларга дарҳол 100 фоизлик бож солинади», — деди Трамп.

Reuters эслатишича, Марк Карни яқинда Хитойга қилган ташрифи чоғида Пекинни «ишончли ва олдиндан башорат қилинадиган ҳамкор» деб атаган. Шунингдек, Давосда бўлиб ўтган иқтисодий форумда у Европа етакчиларини Хитойдан инвестициялар жалб этишга чақирган.

22 январь куни Дональд Трамп Марк Карнини Тинчлик кенгашига таклиф этишни бекор қилганини маълум қилди. Бу қарор Канада бош вазирининг Давос форумидаги чиқишидан кўп ўтмай қабул қилинган. Ўша нутқида Карни шундай деган эди: «Ҳар куни бизга буюк давлатлар рақобати даврида яшаётганимизни, қоидаларга асосланган тартиб йўқолаётганини, кучлилар хоҳлаганини қилаётганини, заифлар эса азоб чекишга мажбур бўлаётганини эслатишмоқда».

«Ўрта даражадаги давлатлар биргаликда ҳаракат қилиши керак. Чунки агар биз музокара столи атрофида бўлмасак, биз менюда бўламиз», — деди у.

Форум иштирокчилари Карнининг нутқини тик турган ҳолда олқишлади. У ўз чиқишида Дональд Трампнинг исмини бирор марта тилга олмаган бўлса-да, нутқ АҚШнинг ҳозирги президенти сиёсатига қарши туришга тайёрлик сифатида қабул қилинди.