Видеодан кадр

Тожикистон Республикасидан контрабанда йўли билан олиб келинган 26,8 кг наркотик моддалар тўхтатиб қолинди, деб хабар бермоқда Давлат хавфсизлик хизмати.

Қайд этилишича, ДХХнинг Чегара Қўшинлари ҳарбий хизматчилари томонидан Хизматнинг Тошкент вилояти бўйича бошқармаси ҳамда божхона идоралари билан ҳамкорликда ўтказилган тезкор тадбирда, 1986 йилда туғилган Тожикистон Республикаси фуқароси «ўзбек-тожик» давлат чегарасини қонунга хилоф равишда бузиб ўтган вақтида тўхтатиб қолинган.

Унга тегишли сумка кўздан кечирилганда, 15 дона ўрамдаги жами 14,5 кг «гашиш» моддаси борлиги аниқланиб, процессуал тартибда расмийлаштириб олинган.

Шундан сўнг, ушбу ажал оғусини буюртма қилган шахсни аниқлаш юзасидан тезкор тадбир давом эттирилган. Натижада, Фарғона вилоятининг Тошлоқ туманида яшовчи, 1969 йилда туғилган Бекобод туманида наркотик моддани қабул қилиб олган вақтида ашёвий далиллар билан ушланган.

Бошқа ҳолатда эса, Хизматнинг Фарғона вилояти бўйича бошқармаси ходимлари томонидан ички ишлар ҳамда божхона органлари билан ҳамкорликда ўтказилган тезкор тадбирда Тошкент вилоятининг Бекобод туманида яшовчи, 1992 йилда туғилган шахс қўшни давлатдан контрабанда йўли билан олиб келинган 9,4 кг «опий» моддасини сотган вақтида ашёвий далиллар билан қўлга олинган.

Терговга қадар текширув давомида, тожикистонлик наркокуръер томонидан Сурхондарё вилояти ҳудудига контрабанда йўли билан етказиб берилган мазкур ажал оғусини Денов туманида яшовчи, 1994 йилда туғилган фуқаро қабул қилиб олиб, Тошкент вилоятига олиб келганлиги аниқланди ва у ҳам процессуал тартибда ушланган.

Қўқон шаҳрида қайд этилган ҳолатда, «Фарғона-Қўқон» йўналишида ҳаракатланаётган «Lacetti» русумли автомашина тўхтатилиб, холислар иштирокида кўздан кечирилган. Натижада унда йўловчи сифатида ҳаракатланаётган — Қўқон шаҳрида яшовчи, 1967 йилда туғилган фуқаро ўзининг бел қисмига 1,7 кг «гашиш» моддасини яшириб олганлиги аниқланган.

Фарғона шаҳрида кузатилган ҳолатда эса, «Фарғона-Тошлоқ» йўналиши бўйлаб ҳаракатланаётган, 1995 йилда туғилган шахс бошқарувидаги «Запарожец» русумли автомашина тўхтатилиб, холислар иштирокида кўздан кечирилганда, унинг салон қисмида 995 грамм «гашиш» моддаси борлиги аниқланди ва тегишли тартибда расмийлаштириб олинган.

Таъкидланишича, ўтказилган тезкор тадбирлар натижасида ашёвий далил сифатида олинган жами 26,8 кг гиёҳвандлик воситалари Тожикистон Республикасидан контрабанда йўли билан олиб келинган.

Ҳозирда ушбу шахсларга нисбатан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.