Видеодан кадр

Тошкент шаҳрида ноқонуний цехда ишлаб чиқарилган қалбаки дори воситалари дорихоналар орқали сотувга чиқарилгани аниқланди. Бу ҳақда Давлат хавфсизлик хизмати хабар берди.

Қайд этилишича, ДХХ ходимлари томонидан Иқтисодий жиноятларга қарши курашиш департаменти билан ҳамкорликда Тошкент шаҳрида ўтказилган тезкор тадбирда биологик фаол қўшимчалар ишлаб чиқаришга ихтисослашган МЧЖга тегишли манзилда ташкил этилган яширин цехда қонунга хилоф тарзда қалбаки дори воситалари тайёрланиши ва шаҳар дорихоналари орқали сотилиши маълум бўлган.

Текширув давомида ушбу манзилдан жами 11 дона дори ишлаб чиқариш станоги, 21 дона дори тайёрлашда керак бўладиган қолип ҳамда умумий оғирлиги 389 кг бўлган кукун ва таблеткалар, “Raikal” номли пневматик қурол ва бошқа нарсалар ашёвий далил сифатида олинган.

Шунингдек, МЧЖга тегишли иккинчи манзилда ҳам яширин цех мавжуд бўлиб, ундан дори воситалари ишлаб чиқаришда фойдаланиладиган қолип ва ускуналар, бўш дори капсулалари, қутилари, йўриқномалар, кукун кўринишидаги хом-ашёлар процессуал тартибда расмийлаштириб олинган.

“Фармацевтика маҳсулотлари хавфсизлик маркази” ДМ экспертиза хулосасига кўра, яширин цехда “Урсосан 250 мг”, “Нейромидин 20 мг”, “Фаниган” дори воситалари қалбакилаштирилган.

Тадбир мантиқий давом эттирилиб, мазкур цехда ишлаб чиқарилаётган дориларни сотиш билан шуғулланувчи ва “Фаниган” дори воситасини қалбакилаштириш бўйича буюртма бериб, 130 кг ушбу дорининг субстанцияларини келтириб берган шахснинг дорихонаси ҳам кўздан кечирилган.

Натижада ушбу дорихонадан “Фаниган”, “Азимак”, “Ципролет” каби 15 турдаги 1 067 қути қалбаки ҳамда 14 турдаги 274 қути яроқлилик муддати ўтган дорилар аниқланган.

Ҳозирда ноқонуний цех ташкилотчиларининг 3 нафарига нисбатан Жиноят кодексининг 186-3-моддаси (Сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш, шунингдек таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузиш) 2-қисми “б” ва “г” бандлари билан жиноят иши қўзғатилиб, тергов ҳаракатлари олиб борилмоқда.