Президентнинг 2025 йил 25 январдаги қарорига кўра, Тошкент шаҳрида Туркий давлатлар халқаро университети ташкил этилади. Ушбу университет халқаро стандартларга мос олий маълумотли кадрларни тайёрлаш ва илмий-тадқиқот фаолиятини олиб бориш мақсадида фаолият юритади. Университетнинг ташкил этилиши таълим соҳасидаги халқаро ҳамкорликни ривожлантиришда муҳим аҳамият касб этади.

Университетнинг асосий йўналишлари муҳандислик, қурилиш, логистика, ахборот технологиялари, соғлиқни сақлаш, қишлоқ хўжалиги, озиқ-овқат саноати ва иқтисодий ҳамда ижтимоий соҳалар учун кадрлар тайёрлашга қаратилган. Ўқув дастурлари Туркиянинг етакчи олий таълим муассасалари билан ҳамкорликда ишлаб чиқилади ва халқаро стандартларга мослаштирилади. Шунингдек, қўшма таълим дастурлари жорий қилиниб, илмий тадқиқотлар амалга оширилади.

Туркий давлатлар халқаро университети нодавлат олий таълим ташкилоти сифатида фаолият юритади. Университет таълим жараёнини Ўзбекистон қонунчилиги асосида ташкил этиб, ўз ўқув дастурларини халқаро рейтингларда биринчи 1000 таликка кирган ва йўналишида етакчи бўлган Туркия Республикаси олий таълим ташкилотлари тажрибаси асосида йўлга қўяди. Таълим жараёни 2025/2026 ўқув йилидан бошлаб амалга оширилади.

Талабалар ўқиши тўлов-контракт асосида ташкил этилади. Қабул параметрлари ва тўлов-контракт миқдори университет томонидан мустақил равишда белгиланади. Университет фаолиятини мувофиқлаштириш ва самарали ташкил этиш мақсадида бошқарув кенгаши ташкил этилади. Ушбу университетнинг ташкил этилиши таълим соҳасидаги халқаро ҳамкорликни мустаҳкамлашда муҳим қадам ҳисобланади.