Ўзбекистон пойтахти 7-Халқаро йога конференциясига мезбонлик қилди. Бу тадбир Марказий Осиёда биринчи марта ўтказилди. “Бир замин, бир саломатлик учун йога” шиори остида ташкил этилган икки кунлик конференция Ҳиндистон Маданий Алоқалар Кенгаши (ICCR), Ҳиндистоннинг Тошкентдаги элчихонаси ва Ўзбекистон Йога Федерацияси томонидан ташкил этилди.

Очилиш маросимида Ўзбекистон Йога Федерацияси раиси Жаҳонгир Ортиқхўжаев, Ўзбекистон Спорт вазирлиги маслаҳатчиси Шарифжон Мўминжонов, Ҳиндистоннинг Ўзбекистондаги элчиси Смита Пант, ICCR Бош директори ўринбосари Абхай Кумар ва Ҳиндистоннинг Ayush вазирлиги вакиллари иштирок этди.

Элчи Смита Пант ўз кириш сўзида Ўзбекистонда йогага бўлган қизиқиш ортиб бораётганини таъкидлаб, унинг мамлакат ёшлари орасида тобора оммалашиб бораётганини қайд этди. У Ҳиндистоннинг минтақада салоҳиятни ошириш ва ўқитувчилар тайёрлаш бўйича ўз мажбуриятларини яна бир бор тасдиқлади.

ICCR Бош директори ўринбосари Абхай Кумар конференциянинг Марказий Осиёда ўтказилиши муҳимлигини таъкидлади. “ICCR биринчи марта ушбу минтақада бундай кенг кўламли халқаро йога конференциясини ташкил қилмоқда. Евросиёдаги 10 та давлат вакилларининг иштироки билан ушбу тадбир йогани янги чегараларга олиб чиқиш ва ёш авлодлар орасида янада оммалаштириш йўлидаги муҳим қадам бўлди”, - деди Кмар жаноблари.

Асосий маърузачи, таниқли йога эксперти Шри М “Йога ва онг” мавзусида қилган чиқишида йоганинг чуқур маънавий ўлчамларига эътибор қаратди. “Йога - онг ёки санскрит тилида четна деб аталадиган кўп ўлчовли мавжудотни ўрганиш учун энг яхши восита”, - деб тушунтирди у ва йога нафақат жисмоний фаровонликни, балки ўзини англаш ва руҳий тиниқликка олиб борадиган йўлни ҳам таклиф қилишини таъкидлади.

Унинг фикрлари кейинги муҳокамалар учун оҳанг бағишлади ва йогани тана, онг ва руҳни бирлаштирадиган, шу билан бирга замонавий саломатлик муаммоларини ҳал қиладиган яхлит фан сифатида талқин этди.

Икки кунлик тадбирда 10 мамлакатдан, жумладан Ҳиндистон, Ўзбекистон, Қозоғистон, Қирғизистон, Тожикистон, Туркманистон, Грузия, Арманистон, Мўғулистон ва Россиядан вакиллар иштирок этди. Уларнинг иштироки йоганинг Жанубий Осиёдан ташқарига чиқиб, турли маданиятлар ўртасида бирлаштирувчи амалиёт сифатида қабул қилинишини акс эттиради.

Халқаро йога конференцияси ICCRнинг йиллик равишда турли глобал шаҳарларда ўтказиладиган ва амалиётни бутун дунё бўйлаб тарғиб қилишга қаратилган флагман ташаббусига айланди. Аввалги тадбирлар Нью-Йорк (2018), Лондон (2019), Янги Деҳли (2021), Сеул (2022), Майнберг (Германия, 2023) ва Дурбан (2024) да бўлиб ўтган. Энди Тошкент ушбу рўйхатга Марказий Осиёнинг ушбу тадбирга мезбонлик қилаётган биринчи шаҳри сифатида қўшилди.

Конференцияда қатор интерактив ялпи мажлислар ва панел муҳокамалари ўтказилди. Марказий мавзулардан бири “Йогани анъанавий ва замонавий соғлиқни сақлаш тизимларига интеграциялаш” бўлиб, унда Марказий Осиёнинг маҳаллий даволаш анъаналарини замонавий тиббиёт амалиёти билан қандай бирлаштириш мумкинлигига қаратилган.

Экспертлар ва амалиётчилар шунингдек, Марказий Осиёда йоганинг ҳолати, уни кенгроқ қабул қилишдаги муаммолар, ҳамкорлик имкониятлари ва йоганинг сурункали касалликларни бошқаришдаги роли каби долзарб масалаларни ўргандилар.

Конференция нафақат йогани нишонлаш, балки амалий натижаларга эришиш ҳам мақсад қилган. Муҳокамалар якунида иштирок этувчи мамлакатлардаги манфаатдор томонларга расмий тавсиялар тақдим этилди. Улар Евросиё бўйлаб йога амалиёти ва таълимини институтлаштиришга ёрдам берадиган сиёсатлар, ўқув доиралари ва қўшма лойиҳаларга қаратилди. Соғлиқ билан боғлиқ муаммолар мураккаблашиб бораётган бир пайтда, йога индивидуал фитнес, руҳий бардошлилик ва ижтимоий уйғунликка ҳисса қўша оладиган оддий, аммо чуқур амалиёт сифатида ўрин олмоқда.

Тошкент конференцияси йога умумий аҳамиятининг эслатмаси бўлиб хизмат қилади. Қадимги Ҳиндистоннинг анъанаси бўлган йога энди саломатлик, мувозанат ва тинчлик хабари орқали жамоаларни бирлаштирган миллатлар ўртасидаги кўприкка айланмоқда.

“Халқ сўзи”.