Ўзбекистонда йўналишсиз такси фаолиятига қўйилган ҳудудий чекловлар кенг жамоатчилик муҳокамаларига сабаб бўлмоқда. Унга кўра, эндиликда ҳар бир ҳайдовчи ўз ҳудудида ва унга туташ ҳудудда такси фаолиятини амалга ошириши белгиланган.

Ўзбекистон Халқ демократик партияси йўналишсиз такси фаолиятига қўйилган ҳудудий чекловлар Конституцияга зид эканини таъкидлаб, ҳолат бўйича транспорт вазиридан расмий тушунтириш сўраб сўров юборган. Бу ҳақида ХДПнинг расмий Telegram-каналида маълум қилинди.

Ўзбекистон Халқ демократик партияси фракцияси ушбу чеклов Ўзбекистон Республикасининг янги қабул қилинган Конституциясининг 67-моддасида белгиланган талабига зид келишини маълум қилган.

«Конституциямизга мувофиқ, давлат қулай инвестициявий ва ишбилармонлик муҳитини таъминлайди. Ўзбекистон Республикаси ҳудудида иқтисодий макон бирлиги, товарлар, хизматлар, меҳнат ресурслари ва молиявий маблағларнинг эркин ҳаракатланиши кафолатланади.

Йўналишсиз такси фаолияти билан боғлиқ жорий қилинган чеклов турли ноқонуний фаолиятларни бошланишига, уларни эркин меҳнат фаолиятини олиб боришга тўсқинлик қилишга, энг асосийси фуқароларимизни конституциявий ҳуқуқларини чекланишига олиб келади», — дейилади ХДП хабарида.

Шунингдек, Ўзбекистон Республикаси Конституциясининг 42-моддасига кўра, ҳар ким муносиб меҳнат қилиш, касб ва фаолият турини эркин танлаш, ишсизликдан қонунда белгиланган тартибда ҳимояланиш ҳуқуқига эгалиги назарда тутилган.

Йўналишсиз такси фаолияти билан шуғулланаётган фуқароларимиз ўзини ўзи банд қилган шахс сифатида ишсизликдан ҳимояланиш ҳуқуқидан фойдаланган ҳисобланади. Бундай шахслар қонунларда белгиланган тартибда тегишли лицензия олиб, тегишли солиқларни тўлаган ҳолда тўлиқ қонуний фаолият юритиб келмоқда.

Ўзбекистон Халқ демократик партияси фракцияси юқоридагилардан келиб чиқиб, йўналишсиз таксилар бўйича чеклов жорий қилишга ҳеч қандай ҳуқуқий асослар йўқлигини, аксинча, конституциявий меъёрларга зид келаётган жиҳатлари яққол кўриниб турганини таъкидлаган.