Фото: ДХХ

Сурхондарё вилояти Сариосиё туманида ҳоким ёрдамчиси, муҳандис ва қишлоқ хўжалиги масъулига нисбатан жиноят иши қўзғатилди. Бу ҳақда Давлат хавфсизлик хизмати хабар берди.

Маълум бўлишича, Сариосиё туманидаги МФЙларидан бирида ҳоким ёрдамчиси ўз хизмат мавқеидан фойдаланган ҳолда 29 ёшли фуқаронинг ишончига кирган. У фуқародан мансабдор танишлари орқали туман ҳокимлиги захирасидаги 2,5 гектар суғориладиган ер майдонини 30 йил муддатга ижарага олиб бериш эвазига 29 миллион сўм талаб қилган.

Давлат хавфсизлик хизмати, Иқтисодий жиноятларга қарши курашиш департаменти ва Ички ишлар идоралари ходимлари ҳамкорлигида ўтказилган тезкор тадбирда ҳоким ёрдамчиси сўралган пул маблағини олган вақтида ашёвий далиллар билан ушланган.

Терговга қадар текширув давомида, у ушбу пул маблағини «Ўздаверлойиҳа» илмий лойиҳалаш институтининг «Сурвилерлойиҳа» бўлинмаси муҳандиси ҳамда Сариосиё тумани қишлоқ хўжалиги бўлими шўъба бошлиғига бериши кераклиги аниқланган.

Шундан сўнг тезкор тадбир давом эттирилиб, муҳандис ва шўъба бошлиғи ушбу пул маблағини олган вақтларида уларнинг ноқонуний ҳаракатларига чек қўйилган.

Билдирилишича, ҳозирда мазкур шахсларга нисбатан Жиноят Кодексининг 168 ва 211-моддалари билан жиноят иши қўзғатилиб, тергов ҳаракатлари олиб борилмоқда.