Фото: Иллустратив

Тадқиқотчилар юз ҳароратини хариталаш орқали диабет ва юқори қон босими каби сурункали касалликларни аниқлаш имконини берувчи технология яратишди.

Ушбу сунъий интеллект (СИ) юзнинг турли минтақаларида ҳарорат фарқларини аниқлаш учун термал камералардан фойдаланади. Бу ҳақда «Cell Metabolism» журналида чоп этилган мақолада батафсил баён қилинган.

Илмий изланиш шуни кўрсатадики, совуқроқ бурун ва иссиқ ёноқлар қон босимининг ошишини кўрсатади. Тадқиқотчилар 21 ёшдан 88 ёшгача бўлган 2 минг 800 нафар хитойлик иштирокчининг юз ҳароратини таҳлил қилишиб, ана шундай хулосага келишди. Бу жараёнда мутахассислар инсоннинг термал ёшини башорат қилиш учун СИ моделларини синаб кўришди. Аниқланишича, ёш ўтиши билан бурун соҳасидаги ҳарорати пасайиб, кўз соҳасининг ҳарорати кўтарилиб боради. Қандли диабет ва жигар билан боғлиқ метаболик касалликларга чалинган одамлар тезроқ термал қариши ва кўз атрофидаги ҳарорат юқорилашгани маълум бўлган.

«Кўтарилган қон босими ёноқ ҳароратининг ошиши билан боғлиқ», дейилади мақолада. Бу ҳарорат ўзгаришлари яллиғланиш билан боғлиқ ҳужайра фаоллигининг кучайиши орқали содир бўлиши мумкин.

Тадқиқот шунингдек, жисмоний фаолликнинг термал ёшга таъсирини ўрганди. Маълум бўлдики, икки ҳафта давомида ҳар куни арқондан машқ қилган иштирокчилар термал ёшини беш йилгача қисқартиришга эришганлар.

Мутахассислар касалликнинг эрта ташхиси учун клиник шароитларда термал юз тасвирини қўллашни фойдали бўлишига умид қилмоқдалар. Энди тадқиқотчилар ушбу технология уйқу бузилиши ёки юрак-қон томир муаммолари каби бошқа жиҳатларни башорат қила оладими ёки йўқлигини текширишни режалаштиряпти.

Аввалроқ, уйқу дориларнинг зарарлари кўплигини, аммо бу сафар олимлар унинг фойдасини кашф қилишгани ҳақида хабар берилганди.