Мамлакатимизнинг  Сингапурдаги элчихонаси томонидан Ўзбекистон мустақиллигининг ўттиз икки йиллиги муносабати билан тантанали байрам кечаси ташкил этилди.

Тадбирда Сингапур расмий вакиллари, шу жумладан парламент аъзолари, қатор вазирлик ва идора масъуллари, қабул қилувчи давлатнинг сиёсий, иқтисодий, сармоявий, илмий-таҳлилий, маданий доиралари, дипломатик корпус вакиллари, шунингдек, Сингапурда истиқомат қилаётган ватандошлар иштирок этди.

Тантанали кечанинг фахрий меҳмони сифатида Сингапурнинг мудофаа ишлари бўйича катта давлат вазири Хенг Чи Хоу ва парламент аъзолари Лян Энг Хва ҳамда Тин Пей Линг қатнашди.

Мудофаа ишлари бўйича катта давлат вазири Хенг Чи Хоу ўз нутқида, Ўзбекистон ва Сингапур ўртасида дипломатик муносабатлар ўрнатилганидан буён мамлакатларимиз ўртасида доимий ва мустаҳкам ҳамкорлик йўлга қўйилганини таъкидлади. «Бу ҳамкорлик нафақат икки томонлама, балки кўп томонлама шаклларда ҳам ривожланиб бормоқда. Бунга Ўзбекистон Президенти Шавкат Мирзиёев ва Сингапурнинг собиқ Президенти Ҳалима Яқубнинг муҳим давлат ташрифлари катта аҳамиятга эга», деди у.

Шунингдек, Хенг Чи Хоу Ўзбекистоннинг тараққиёт йўлини, унинг маданий-тарихий меросини, Самарқанд, Бухоро, Хива ва Тошкент каби шаҳарлардаги меъморчилик мўъжизаларини чуқур англаш ва қадрлашини қайд этди.

Ўзбекистоннинг Сингапурдаги элчиси Қаҳрамон Шакиров ўз навбатида, 2023 йил икки томонлама муносабатлар йилномасига тарихий аҳамиятга эга бўлган йил сифатида муҳрланганини таъкидлади. «Январь ойида Ўзбекистон Президенти Шавкат Мирзиёевнинг Сингапурга ташрифи ҳамда жорий йилнинг май ойида Сингапурнинг собиқ Президенти Ҳалима Яқубнинг Ўзбекистонга жавоб давлат ташрифини эътироф этиш керак. Ушбу муҳим давлат ташрифлари икки томонлама алоқаларимизни янги босқичга олиб чиқишга хизмат қилмоқда», деди Ўзбекистон элчиси.

Тадбирнинг маданий дастури доирасида мамлакатимизнинг туризм ва маданий-гуманитар салоҳиятига бағишланган фотокўргазма ташкил этилди.  Байрам кечаси якунида уюштирилган концерт дастури эса барчага бирдек хуш кайфият улашди.