Олий Мажлис Сенати Раиси Танзила Нарбаеванинг Яннис Беллингхаузен бошчилигидаги «Better Cotton Initiative» (BCI) халқаро ташкилоти делегацияси билан учрашуви бўлиб ўтди.

Учрашувни очаркан, Т. Нарбаева Ўзбекистоннинг Better Cotton Initiative билан ҳамкорликни юқори баҳолашини, айниқса қишлоқ хўжалиги барқарорлигини ошириш, муносиб меҳнат тамойилларини илгари суриш ва пахта-тўқимачилик таъминоти занжирларида шаффофликни кучайтириш борасида ташкилотнинг қўллаб-қувватлаши муҳим аҳамият касб этаётганини таъкидлади.

Қайд этилганидек, пахта-тўқимачилик соҳаси мамлакат иқтисодиётининг етакчи йўналишларидан бири бўлиб, сўнгги йилларда кенг қамровли ислоҳотлар натижасида тубдан янгиланди.

Бугунги кунда ўзбек пахтасининг экспорт географияси кенгайиб, 80 дан ортиқ давлатларга пахта-тўқимачилик маҳсулотлари экспорт қилмоқда.

Экспорт ҳажмини ошириш, соҳага янада кўпроқ инвестицияларни жалб этиш, бу ишларга тўқимачилик соҳасидаги йирик халқаро брендларни кенгроқ жалб қилишда соҳага муносиб меҳнат тамойилларига, экологик барқарорликка ҳамда халқаро техник ва ишлаб чиқариш талабларига асосланган стандартларни жорий этиш муҳим аҳамиятга эга эканлиги таъкидланди.

Учрашув давомида ушбу халқаро стандартларни ўзида мужассам қилган BCI стандартларини янада кенг жорий этиш масалалари муҳокама қилинди.

Хусусан, BCI стандартларини миллий стандарт сифатида қабул қилиш, бу борада миллий аудиторларни тайёрлаш, кичик ва ўрта бизнес учун сертификатлаш харажатларини қисқартиришга қаратилган қўшма лойиҳасини амалга ошириш, сертификат бериш бўйича ўтказиладиган ўрганишлар муддатини қисқартириш имкониятини кўриб чиқишга келишилди.

Шунингдек, Ўзбекистоннинг халқаро кўргазмалар ва барқарор текстиль форумларидаги иштирокини кенгайтириш, халқаро брендлар билан ҳамкорликни кенгайтириш ва улар иштирокида Ўзбекистонда халқаро тадбирларни ташкил этиш имконияти ҳам истиқболли йўналиш сифатида алоҳида қайд этилди.

Учрашув якунида Ўзбекистон келажакда ҳам қўшма ташаббусларни қўллаб-қувватлашга тайёр эканини билдирди.