Кеча, 9 январь куни Саудия Арабистонида ташкил этилаётган U-23 Осиё чемпионати мусобақасининг 2-тур ўйинлари старт олди. Кун доирасида ўрин олган баҳсда Вьетнам U-23 терма жамоаси Қирғиз Республикаси билан куч синашди.

Учрашув Вьетнамнинг 2:1 ҳисобидаги ғалабаси билан якунланди. Ўйинда киритилган голларга ғолиблар сафидан Хуат Ван Ханг муаллифлик қилди. Яна бир гол автогол сифатида Кристиан Бауцман ҳисобига ёзилди. Қирғиз Республикасининг ягона жавоб голига эса Марлен Мурзааҳмадов муаллифлик қилди.

Куннинг иккинчи ўйинида эса мусобақа мезбони — Саудия Арабистони U-23 терма жамоаси кутилмаганда Иордания термасига 2:3 ҳисобида мағлуб бўлди.

Ўйинда киритилган голларга ғолиблар сафидан Али Ал-Азайза (2 та) ва Маҳмуд Диб муаллифлик қилди. Саудия Арабистони U-23 терма жамоасининг голлари эса Мусаб Ал-Жувайр ва Рокам Ал-Ғамдий ҳисобига ёзилди.

Бугун мусобақанинг “B” ва “C” гуруҳларида ҳам баҳслар давом эттирилади. Кун доирасида Ўзбекистон U-23 терма жамоаси Эрон термаси билан куч синашади. Ўйин Тошкент вақти билан соат 19:00 да старт олади.