Абдулазиз ЙЎЛДОШEВ/«Халқ сўзи». «Географик кўрсаткичлар тўғрисида»ги Қонунга кўра, товарни муайян географик объект ҳудудидан келиб чиққан товар сифатида идентификацияловчи белги географик кўрсаткич деб эътироф этилиб, унда товарнинг сифати, ном қозонганлиги ёки бошқа хусусиятлари унинг географик жиҳатдан келиб чиқишига сезиларли даражада боғлиқ бўлади.

Адлия вазирлиги географик кўрсаткичларни ҳуқуқий жиҳатдан муҳофаза қилиш соҳасидаги ваколатли орган ҳисобланади. Самарқанд вилояти адлия бошқармаси ва «Интеллектуал мулк маркази» давлат муассасасининг кўмаги билан жорий йилнинг 3 июль куни «Самарқанд нўхат шўраги» географик кўрсаткич сифатида Адлия вазирлиги томонидан давлат рўйхатидан ўтказилди.

Самарқанд вилоят адлия бошқармаси бошлиғи Салоҳиддин Сатторов бугун Самарқанд вилоят ҳокими вазифасини бажарувчи Адиз Бобоевга «Самарқанд нўхат шўраги» географик кўрсаткич ҳужжатини топширди.

Ўзбек миллий таомларини тайёрланиш жараёни ва овқатланиш маданияти жуда узоқ тарихга эга ва ўзбек халқнинг кўп йиллик тажрибасига асосланади. Урф-одат ва анъаналар ҳудуднинг иқлим шароитидан ва маҳаллий аҳолининг турмуш тарзидан келиб чиққан ҳолда шаклланган. Ҳар бир ҳудуд аҳолиси миллий таомлар тайёрлаш борасида ўз услубига эга.

Самарқанд нўхат шўрагининг ўзига хос томонларидан яна бири — таомда пиширилган гўштлар ва илик аралашмаси, ушбу маҳсулотлар қайнатилган шўрва, шунингдек, 1-2 соат давомида хона ҳароратида қуритилган Самарқанд нонининг ишлатилиши натижасида таъмларнинг умумий гаммасига эришишидир.