Президент Администрацияси раҳбари Саида Мирзиёева Европа тикланиш ва тараққиёт банки президенти Одиль Рено-Бассо билан учрашув ўтказди.

Учрашувда Президент Администрацияси раҳбари Президент Шавкат Мирзиёевнинг очиқлик сиёсати ва мамлакат фаровонлигини оширишга қаратилган ислоҳотлари туфайли Ўзбекистон ва Европа тикланиш ва тараққиёт банки ўртасидаги ўзаро манфаатли ҳамкорлик сифат жиҳатидан янги босқичга кўтарилганини, шунингдек, банк кўмагида ирригация ва «яшил» иқтисодиёт соҳаларида амалга оширилаётган кенг кўламли инфратузилма лойиҳаларини алоҳида қайд этиш лозимлигини таъкидлади.

«Европа тикланиш ва тараққиёт банки президенти Одиль Рено-Бассо билан учрашганимдан хурсандман. Биз мамлакатимиздаги кўплаб хотин-қизлар ва ёшларнинг ҳаётини ижобий томонга ўзгартираётган «Women in Business» ва «Youth in Business» дастурлари қўллаб-қувватланаётгани, шунингдек, Қорақалпоғистонда ҳудуднинг барқарор ривожланишига қаратилган лойиҳаларни йўлга қўйиш бўйича ҳамкорликни юксак қадрлаймиз», — дейди Саида Мирзиёева.

Мазкур учрашув давомида Марказий Осиё мамлакатларининг яхши қўшничилик борасидаги умумий саъй-ҳаракатлари туфайли минтақада ишонч ва ҳамкорлик муҳити қарор топгани ҳақида якдил фикр билдирилди.

«Ишончим комилки, Европа тикланиш ва тараққиёт банки билан шериклик бундан буён ҳам Ўзбекистон ва бутун минтақанинг равнақига хизмат қилади», — деди Президент Администрацияси раҳбари.