d-russia.ru сайтининг ёзишича, Россия Давлат Думаси томонидан Дума депутатларининг депутатлик сўровларини интернетга очиқ ҳолда жойлаштириш бўйича қарор қабул қилинибди.

Россия парламенти аъзоларининг билдиришича, амалиётда депутатлик сўровини олган масъул давлат органлари депутатлик сўровидаги масалани ўрганиш жараёни якунида айрим ҳолларда бундай сўровни олмаганликларини билдириб, баҳона қилишаркан.

Шу боис, бу тартибнинг жорий қилиниши очиқ манбада ҳамма учун кўриниб турган сўровни ўз вақтида кўриб чиқиб, жавоб беришга мажбур бўлинади, деган важ келтирилмоқда.

Бундай қарорнинг қабул қилиниши давлат органларининг вакиллик органлари олдидаги масъулиятини ошириш билан бирга депутатлик сўрови киритмоқчи бўлган парламент вакилларини ҳам сўровда қўяётган масалаларига яна ҳам жиддий ёндашишга мажбур қилади. Акс ҳолда шарманда бўлиш ҳеч гапмас.

Худди шундай тартибни Ўзбекистон парламенти амалиётида жорий этиш ҳақида ҳам бир неча йилдан бери бот-бот айтиб келинмоқда. Ва ҳаракатлар бошланган, бироқ Россиядан кеч қолибмиз.

Тан олиш керак: депутатлик сўровларига эътибор масаласида Россия парламенти вакилларини ўйлантираётган масалалар айни вақтда биз учун ҳам оғриқли, деса бўлади.

Афсуски амалиётда айрим идора ва ташкилотлар томонидан депутатлик сўровларига умуман жавоб бермаслик ёки «сўров бизга келмаган», деган баҳона билан қутулиш ҳоллари учраб туради.

Умид қиламизки, тез орада парламентда очиқликни янада таъминлаш доирасида Олий Мажлис депутатларининг депутатлик сўровларини ҳам интернет тармоғида мажбурий тартибда жойлаштириб бориш амалиётига ўтилади. Шунда ҳар қандай сайловчи ўз вакилининг қандай масалалар устида ишлаётгани ва назорат ваколатларидан қанчалик фойдаланаётганини яқинроқ кузатиб бориш имконияти ошади.
Расул Кушербаев,
Олий Мажлис Қонунчилик палатаси депутати