Олий Мажлис Сенатининг Бюджет ва иқтисодий масалалар қўмитасининг Қорақалпоғистоннинг Қораўзак туманида ўтказилган сайёр мажлисида аҳолини иш билан банд қилиш бўйича олиб борилаётган ишлар ҳолати муҳокама қилинди.

Таъкидланганидек, мамлакатимизда аҳолини турмуш фаровонлигини ошириш, айниқса, аҳоли бандлигини таъминлашга қаратилган кўплаб лойиҳалар, дастурлар ишлаб чиқилиб, тадбиркорлик фаолиятини бошлаш ниятида бўлган фуқаролар учун кенг имкониятлар яратилмоқда.

Қўмита аъзолари ўз чиқишларида ўтган қисқа даврда амалга оширилган ислоҳотлар, айниқса, тадбиркорлик ривожига қаратилаётган эътибор ҳаётимизнинг барча жабҳаларида янгиланиш ва туб ўзгаришларга замин яратиб, жамиятимизнинг ижтимоий-иқтисодий ҳамда маданий-маърифий манзараси бутунлай ўзгарганини таъкидлаб ўтди.

Хусусан, жорий йилнинг ўтган даврида 3,7 минг аҳолини даромадли меҳнат билан банд қилиш режаси 129 фоизга бажарилган. Жумладан, тижорат банклари томонидан аҳолининг 2,6 минги, қишлоқ хўжалиги йўналишида 1,2 минги ҳамда инвестиция лойиҳалари ҳисобига 800 дан зиёд киши иш билан таъминланган.

Биргина «Маҳалла» лойиҳаси доирасида 21,5 млрд сўм, «Кичик бизнесни узлуксиз қўллаб-қувватлаш» дастури доирасида 11,9 млрд сўм, «Оилавий тадбиркорлик» дастури доирасида 9,7 млрд сўм ҳамда «Бизнесга биринчи қадам» дастури доирасида 6,9 млрд сўм кредитлар ажратилган.

«Камбағал оилалар реестри»га киритилган 1 мингта оилани камбағалликдан чиқариш бўйича 9,1 мингта индивидуал режа тузилган. Ушбу режалар доирасида 4,2 минг аҳоли ёки 907 та камбағал оилага даромадни оширишга қаратилган 1,5 мингта хизмат кўрсатилган.

Шунингдек, сенаторлар мажлисда олий таълим муассасалари битирувчилари бандлигини таъминлаш борасида амалга оширилган ишларга ҳам тўхталиб ўтди. Жумладан, тумандан ижтимоий соҳа йўналишидаги олий таълим муассасаларини тамомлаган 287 нафар битирувчининг бандлиги таъминланган.

Муҳокама жараёнида сенатор ва депутатлар томонидан туманда аҳолини иш билан банд қилишда ўз ечимини кутиб турган масалалар, шунингдек, йўл қўйилган хато ва камчиликлар кўрсатиб ўтилди.

Мажлис сўнггида туманда аҳолини иш билан банд қилиш ва мавжуд имкониятлардан самарали фойдаланиш ҳамда камбағалликни қисқартириш орқали турмуш даражасини яхшилаш юзасидан тавсиялар берилди.