Ассалому алайкум, халқаро майдонда юз бераётган воқеа ва ҳодисаларнинг қисқача шарҳи «Халқ сўзи» ва «Народное слово» газеталарининг таҳлилий-информацион дастурида

Исроилнинг Ливанга бостириб кириш режаси маълум бўлди

Исроил ва Ливан таранглиги кучайиб бормоқда. Оқ уй вакили Амос Хохштейн АҚШ Исроил ва «Ҳизбуллоҳ» ўртасидаги конфликтнинг урушга айланиб кетишини тўхтатиш учун қаттиқ ҳаракат қилаётганини билдирди. Бу ҳақда Байрутда қилган чиқишида айтиб ўтган.

Ливанга ташрифи чоғида Амос Хохштейн Ғазода октябрь ойида бошланган урушдан буён кучайиб бораётган можарони зудлик билан ҳал қилишни таъкидлаб, «Ҳизбуллоҳ» ва Исроил сўнгги саккиз ой давомида Исроил—Ливан чегарасидаги инцидентларнинг катта можарога айланиш хавфини оширганини билдирди.

Исроил кучлари томонидан «Ҳизбуллоҳ» қўмондонларидан бири ўлдирилганидан сўнг Исроил ҳарбий объектларига юзлаб ракета ва учувчисиз учоқлар отилган эди. Хохштейн Ливан парламенти спикери Набиҳ Берри билан учрашгандан сўнг, янада кенгроқ урушга айланишининг олдини олиш учун «шошилинч» деескалация зарурлигини айтиб ўтган.

«Ҳизбуллоҳ» Қурбон ҳайити байрами пайтида ҳужумларини тўхтатиб турди, бироқ шундан сўнг яна фаолликка ўтди. Гуруҳ, шунингдек, Ҳайфадаги Исроил ҳарбий объектлари ва асосий инфратузилмалари акс этган видеони тарқатиб, Ғазода ўт очишни тўхтатмаса, ҳужумларини давом эттиришларини билдирган.

Исроил Мудофаа вазирлигининг 18 июндаги маълумотига кўра мамлакат армиясининг Ливанга бостириб кириш бўйича тезкор режаси эълон қилинган.

Хитой ядровий қуроллар сонини оширмоқда

Стокголм халқаро тинчлик тадқиқот институти (СИПРИ) маълумотларига кўра, Хитойнинг ядро қуроллари захираси тез суръатлар билан ўсиб, мамлакатда биринчи марта фаол ядро каллакларини жойлаштирган.

Тадқиқот ҳисоб-китобларига кўра, Хитой ўзининг ядровий арсеналини 2023 йилнинг январида тахминан 410 та жанговар каллакдан 2024 йилга келиб 500 тага етказган. Бу ўсиш Пентагоннинг октябрь ойида эълон қилган ҳисоб-китобларига мос келади.

Хитойнинг Тайванга бостириб кириши ҳақидаги даъволар кучаяётган бир пайтда ядровий фаоллик ташқи томоннинг ёрдамини тўсиб қўйиш учун ишлатилиши мумкин. Ҳозирча Пекин ушбу ядровий фаоллигини тўла-тўкис қилиб изоҳламаган.

Европа Иттифоқининг янги шиори

Венгрия Европа Иттифоқи Кенгашига раислик қиладиган олти ойлик шиори сифатида «Европани яна буюк қилайлик» деб эълон қилди. Бу ҳақда «Politico» нашри хабар берди.

Гап шундаки, бу шиор Доналд Трампнинг 2016 йилги АҚШ президентлик кампаниясидаги «Американи яна буюк қилиш» шиорининг ремейкидир. Венгриянинг Европа Иттифоқи ишлари бўйича вазири Янош Боканинг тушунтиришича, шиор Европа Иттифоқидаги бирликнинг муҳимлигини таъкидлаб, алоҳида мамлакатларга ўзлигини сақлаб қолишга имкон беришдан иборат.

Журналистлар матбуот анжумани чоғида Трамп шиорига ўхшашлик ҳақида саволлар беришди. Бока, асосий эътибор Трамп кампаниясини такрорлашга эмас, балки фаол ва кучли президентликка қаратилганини айтди.

Венгриянинг «Европани яна буюк қилиш» шиорини қабул қилиши Бош вазир Виктор Орбан давридаги россияпараст позициясини ҳисобга олган ҳолда эътиборга молик қадамдир. Ушбу шиорни қабул қилиш, шунингдек, Венгрия учун дипломатик мувозанат муҳимлигини ифодалайди.

Россия элчиси Украинадаги тинчликнинг асосий шартини айтди

Россиянинг АҚШдаги элчиси Анатолий Антонов Москва Украинадаги урушни тугатиш йўли сифатида кўраётган лойиҳасини тақдим этди. У «Newsweek» нашрига берган баёнотида Ғарбнинг можарони тўхтатишга қаратилган саъй-ҳаракатларини шунчаки «хаёлий истаклар» сифатида талқин қилган.

«Юқорида қайд этилган масалалар юзасидан суҳбат Оқ уйнинг «императорлик» истаги ва буйруғисиз ўтказилиши керак. Қўшма Штатлар ўз иродасини барча мамлакатларга татбиқ этиш учун доимий интилиш бефойда эканлигини тан олиш вақти келди. Кўп қутблилик томон ўсиб бораётган силжишни энди тўхтатиб бўлмаслигини англаб етиш керак», деган Антонов.

Президент Владимир Путин янги музокараларга тайёрлигини билдирди, бироқ Россиянинг ҳудудий даъволарини ҳурмат қилиш кераклигини таъкидлади. Улар орасида Қрим ва бошқа минтақаларнинг аннексия қилиниши, Украинанинг нейтраллиги ва демилитаризацияси ҳам бор.

Владимир Путин Шимолий Кореяга борди

Россия Федерация президенти Владимир Путин 18 июнь куни тунда Шимолий Кореяга ташриф буюрди. Бу унинг 24 йил ичидаги илк ташрифидир. Путинни шахсан Ким Чин Иннинг ўзи Пхенян аэропортида кутиб олган.

19 июнь куни Ким Ир Сен майдонида Владимир Путинни кутиб олиш маросими бўлиб ўтди. Томонлар икки томонлама кенг қамровли шериклик тўғрисида янги шартнома имзолаши кутилмоқда.

Бу ҳақда қолган тафсилотларни «Халқ сўзи»нинг ижтимоий тармоқларидаги саҳифаларида кузатиб боринг