Бугун, 11 апрель куни Мудофаа вазирлиги Ахборот-коммуникация технологиялари ва алоқа ҳарбий институтида “Профессионал армия бошқарувини ривожланишида инновациялар ва рақамлаштиришнинг ўрни” мавзусидаги VII Халқаро илмий-амалий конференция бўлиб ўтди.

Мудофаа вазирлиги Ахборот ва оммавий коммуникациялар департаментидан маълум қилинишича, конференция назарий ва амалий қисмлардан иборат бўлиб, интерактивликка алоҳида эътибор қаратилди. Унда соҳа мутахассислари, ҳарбий ва ҳарбийлаштирилган таълим муассасалари профессор-ўқитувчилари, курсантлар, тадқиқотчилар, ихтирочилар, давлат ва жамоат ташкилотлари ҳамда халқаро дипломатик корпус вакиллари, ҳарбий атташелар, мамлакатимиз куч тузилмалари масъуллари, Жамоатчилик кенгаши аъзолари иштирок этди.

Халқаро илмий-амалий конференциянинг асосий қисми шубаларга бўлинган ҳолда “Машинали ўқитиш ва сунъий интеллект ривожланиш тенденциялари: муаммо ва ечимлари”, “Киберхавфсизликни таъминлашнинг долзарб муаммолари”, “Кадрларни тайёрлашда рақамли ва инновацион технологиялардан фойдаланиш истиқболлари” ҳамда Қуролли Кучлар тизимини рақамлаштиришда телекоммуникация, радиоалоқа, радиолокация, симсиз технологиялар, ҳаво ҳужумидан мудофаа ҳамда радиоэлектрон разведка ва кураш тизимларини ривожлантириш истиқболлари” йўналишларида ўтказилди.

Хусусан, тадбирда “Микро сунъий йўлдошни яратиш”, “Замонавий ҳарбий можароларда учувчисиз учиш аппаратларини қўллаш ва уларга қарши курашиш усуллари”, “DIG DATA муаммоларини ҳал этиш учун унификациялашган маконни шакллантириш”, “Динамик ҳаракатдаги универсал алоқа мажмуасини узлуксиз муқобил энергия билан таъминлашнинг усул ва алгоритмлари” каби 20 дан ортиқ мавзуларда муҳокамалар олиб борилди.

Дарҳақиқат, бугунги давр юртимизда ҳар жиҳатдан замонавий армияни шакллантириш, унда энг сўнгги ахборот-коммуникация технологиялари ва алоқа воситаларини қўллаш, шунингдек, улар билан ишлай оладиган мутахассисларни кўпайтириш ва тажрибасини ошириб боришни талаб этади. Қолаверса, бу борадаги ихтиро ва ишланмалар, илмий тадқиқотларни рағатлантириб бориш соҳа ривожига улкан ҳисса қўшади.

Конференция доирасида “KIBER SPORT”, “CTF”, “DRONREYSING” “ROBOTLAR JANGI” каби мусобақалар ҳам ўтказилди. Шунингдек, иштирокчилар Қуролли Кучлар тизимидаги инновацион ишланмалар кўргазмаси билан яқиндан танишди.