Марказий банк маълумотларига кўра, 2025 йил 1 октябрь ҳолатига Ўзбекистоннинг умумий ташқи қарзи 75,4 миллиард долларни ташкил этган. Бу ҳақда регуляторнинг “Ўзбекистон Республикаси тўлов баланси, халқаро инвестициявий мавқейи ва ташқи қарзи” бўйича эълон қилинган шарҳида айтиб ўтилган.

Қайд этилишича, 2025 йилнинг учинчи чораги якунига келиб мамлакатнинг ялпи ташқи қарзи 82,4 миллиард долларга етган. Ушбу қарз миқдорининг 37,4 миллиард доллари давлат ташқи қарзи ҳисобланади. Қолган қарийб 38 миллиард доллар эса хусусий ҳамда давлат иштирокидаги корхоналар томонидан жалб этилган корпоратив қарзларга тўғри келади.

Маълумотларга кўра, йилнинг тўққиз ойи давомида давлат ташқи қарзи 10 фоиздан ортиққа ўсган бўлса, корпоратив қарз ҳажми қарийб 27 фоизга ошган.

Шу билан бирга, шарҳда давлат ташқи қарзи қолдиғининг чораклик ўсиш суръатларида сезиларли пасайиш кузатилгани таъкидланган. Хусусан, йилнинг биринчи чорагида ўсиш 5,7 фоизни, иккинчи чоракда 3 фоизни ташкил этган бўлса, учинчи чоракда бу кўрсаткич 1,2 фоизгача пасайган.

Марказий банк маълумотида таъкидланишича, 2025 йил 1 октябрь ҳолатига давлат томонидан хориждан жалб қилинган қарз маблағлари қолдиғи 37,4 миллиард долларга тенг бўлган. Шу билан бирга, хўжалик субъектлари ва тижорат банкларининг норезидентлардан олган корпоратив кредит ва қарзлари ҳажми 38 миллиард долларни ташкил этган.

Билдирилишича, норезидентлардан жалб қилинган корпоратив қарз маблағлари асосан хусусий сектор, жумладан тадбиркорлик субъектлари томонидан инвестиция лойиҳаларини молиялаштириш, айланма маблағларни тўлдириш, бизнес фаолиятини кенгайтириш ҳамда бошқа мақсадлар учун, давлат кафолатисиз жалб этилган маблағларни ўз ичига олади.

Шунингдек, Халқаро валюта жамғармаси ҳамда халқаро рейтинг агентликлари ўз баёнотларида Ўзбекистоннинг ташқи қарз юки ўртача даражада эканини, қарзларнинг асосий қисми имтиёзли шартларда олинганини таъкидлаган.