Неврологга ташриф буюрганида, ўсмирлар кўпинча бош оғриғидан шикоят қилади. Бунинг сабаблари турли хил бўлиши мумкин. Лекин энг кўп учрайдигани нерв тизимининг функционал бузилишидир. Бу ҳақда невропатолог Татяна Кошелева маълум қилди.

“Оғриқ кўнгил айниши ёки қусиш билан бирга кузатилиши мумкин. Шунингдек, жисмоний фаоллик билан кучайиши, ёруғлик ва товушга сезгирлик билан бирга намоён бўлиши мумкин. Бу мактабдаги юкламанинг ошиши ва болада сурункали стресс туфайли юзага келади. Агар бош оғриғига тоқат қилолмаса ва ҳолат бир ойда икки ёки уч мартадан кўпроқ такрорланса, албатта неврологга мурожаат қилиш керак”, деб тушунтиради Татяна Кошелева.

Мутахассиснинг сўзларига кўра, шифокорга ташриф буюришдан олдин, боланинг онаси бош оғриғи кундалигини юритиши тавсия этилади. Унда болада қанчалик тез-тез ва қайси вақтда тегишли аломатлар пайдо бўлиши ҳамда қанча давом этиши ёзиб борилади.

Оғриқ боланинг ярим тунда уйғонишига сабаб бўлса ёки уйғонганидан кейин дарҳол ҳис қилса ёки кўнгил айнишини бошдан кечирса, жиддий касаллик ҳақида сигнал бериши мумкин. Бу каби ҳолатларда дори кор қилмаса, неврологга ташрифни кечиктирмаслик керак.