Маълумки, 1 октябрь – Ўқитувчи ва мураббийлар куни мамлакатимизда ҳар йили кенг нишонланади.

Бугун Олий Мажлис Сенатига барча ҳудудлардан келган 250 дан ортиқ таълим фидойилари, устозлар ва соҳанинг масъул ходимлари, мактабгача таълим ташкилотлари, мактаблар ва олий таълим муассасалари педагоглари ташриф буюрди.

Олий Мажлис Сенати аъзолари улар билан учрашиб, мамлакатимизда педагог ва мураббийлар мақоми, меҳнат шароитларига қаратилаётган эътибор, соҳанинг ҳуқуқий асосларини такомиллаштириш, ўқитувчилик касби нуфузини ошириш каби таълим соҳасини ривожлантиришга доир долзарб масалалар муҳокама қилинди.

Учрашувда таълим соҳаси мутахассисларининг фидокорона меҳнати жамиятимизнинг турли жабҳаларида ўз самарасини бераётгани, ўсиб келаётган авлоднинг тарбиясида, пировардида унинг ҳаёт йўлини танлашда ўз аксини топаётгани таъкидланди.

Мактабгача ва мактаб таълими, олий мактабни ривожлантириш юзасидан фикр алмашилди.

Мулоқот мобайнида педагоглар томонидан таълим тизимини тартибга солувчи қонунчиликни такомиллаштириш жараёнида, шубҳасиз, муҳим аҳамиятга эга бўлган таклиф ва ташаббуслар илгари сурилди.

Учрашув сўнгида иштирокчилар Сенат биноси ва унинг фаолияти билан яқиндан танишдилар.