28 ёшли Португалия терма жамоаси ва «Ливерпуль» футболчиси Диого Жота жорий ҳафта бошида Испаниянинг Замора вилоятида рўй берган автоҳалокатда вафот этди. Ливерпул клуби раҳбарлари футболчининг шартномаси амал қиладиган 2027 йилгача унинг оиласига маошини тўлаб туришини билдирди. Бу ҳақда «The Mirror» ёзмоқда.

Маълумки, Жота ва унинг укаси ҳаракатланаётган Ламборгини автомобили тезликни ошириб, бошқа транспорт воситасини қувиб ўтишга уринганида, шиналардан бири ёрилиб кетган. Натижада машина йўлдан чиқиб кетиб, ёниб кетганди.

«Ливерпуль» клуби Жотанинг вафоти муносабати билан расмий баёнот эълон қилиб, унинг оиласи, яқинлари ва жамоага чуқур ҳамдардлик билдирган.

Баёнотда шундай дейилади: «Ливерпуль клуби Диого Жотанинг фожиали ўлимидан ларзага келди. Клуб 28 ёшли футболчининг Испанияда автоҳалокатда вафот этгани ҳақида маълумот олди. Биз унинг оиласига тўлиқ ёрдам кўрсатамиз ва уларнинг шахсий ҳаётига ҳурмат билан ёндашишни сўраймиз».

Шунингдек, клуб мавсум олдидан режалаштирган айрим тадбирларини ҳам бекор қилгани айтилмоқда. Ҳозирча бошқа тафсилотлар маълум эмас.