Франциянинг «Лион» клуби молиявий муаммолар туфайли расман «Лига 2»га туширилгани эълон қилинди. Клуб молиявий ҳолатини назорат қилувчи DNGC ташкилоти вакиллари жорий йилнинг ноябрь ойида клубга вақтинчалик тушириш жазоси тайинлаган эди. Бироқ 18 июнь куни клуб раҳбарияти, жумладан, асосий акциядор Жон Текстор молиявий аҳвол яхшиланганини исботлай олмаган.

Эслатиб ўтамиз, Тексторга тегишли «Eagle Football Group» компанияси «Лион» клубининг 77 фоиз улушига эгалик қилади. Ўтган йил октабр ойида компания 422 миллион фунт қарздорлик ҳақида эълон қилган эди.

«Лион» клуби мазкур қарорни «тушунарсиз» деб атади ва унга расман апелляция беришини билдирди. Клуб баёнотида айтилишича, клуб икки йил кетма-кет Европа мусобақаларига йўлланмани қўлга киритган ва молиявий таъминот бўйича барча шартларни бажарган.

Клуб январь ойида Максенс Какрени «Комо»га, июнь ойида эса Раян Черкини «Манчестер Сити»га сотиб, 45 миллион евро атрофида даромад топган. Бундан ташқари, Александр Ляказетт ва Антони Лопес каби юқори маош олувчи футболчилар ҳам жамоани тарк этган.

Агар апелляция рад этилса, «Лион» ўрнини «Лига 1»да плей-оффда «Мец»га ютқазган «Реймс» эгаллайди. Маълумот учун, «Лион» Франция чемпионатида етти марта зафар қучган ва 2020 йилда Чемпионлар лигаси ярим финалигача етиб борган. Клуб 1989 йилдан буён иккинчи дивизионда ҳаракат қилмаган эди.

Мазкур вазият Англиянинг «Кристал Пелас» жамоасининг Европа Лигаси йўлланмасига ҳам таъсир қилиши мумкин. Сабаби, UEFA қоидаларига кўра, бир мулкчилик тузилмасига мансуб икки жамоа бир мусобақада қатнаша олмайди.

Агар «Лион» «Лига 1»даги ўтган мавсумда қўлга киритган 6-ўрин натижасидан маҳрум этилса, «Кристал Пелас» ўз ўрнини сақлаб қолади. Клуб Англия кубогидаги ғалаба эвазига Европа Лигасига йўлланма олган эди, аммо «Лион»нинг юқори лигадаги натижаси Европа йўлланмаларини қайта тақсимлаш эҳтимолини келтириб чиқарган эди. Ҳозирча UEFA расмий қарорини эълон қилмаган, «Кристал Пелас» эса аниқ жавоб кутмоқда. Франция футбол расмийлари «Лион» натижаларини бекор қилган тақдирда ҳам, апелляция жараёни узоқ давом этиши мумкин.