Фото: dosug.uz

Рақобатни ривожлантириш ва истеъмолчилар ҳуқуқларини ҳимоя қилиш қўмитаси «Корзинка» («Anglesey Food» МЧЖ) супермаркетлар тармоғига нисбатан тегишли тартибда иш қўзғатди. Бу ҳақда қўмита ахборот хизмати маълум қилди.

Қайд этилишича, «Корзинка» томонидан турли хил усулларда тарқатилаётган реклама ахборотида «Кундалик харидларга энг арзон нарх», «Энг арзон нарх — Корзинкада», «...Энг унумлисига келинг!» деган рекламасида фойдаланувчиларни чалғитадиган ёки чалғитиши мумкин бўлган сўз жумлаларидан фойдаланилганлиги кузатилган.

Мазкур реклама ахборотларидаги маълумотларни ўрганиш натижасида, акция доирасида кундалик эҳтиёжлар учун керак бўладиган маълум бир миқдордаги маҳсулотлардан иборат бўлган каталог жорий қилинганлиги маълум бўлган.

Қайд этилишича, «энг арзон нарх» деб эълон қилинган маҳсулотларнинг алоҳида турлари бўйича нархлари бошқа супермаркетлар ва деҳқон бозорларида сотилаётган худди шу турдаги маҳсулотлар нархига нисбатан юқорилиги кузатилган. Қўмита рекламани бундай кўринишда бўлиши рекламадан фойдаланувчиларни чалғитишга олиб келувчи ҳолат, деб ҳисоблаган.

«Юқоридагиларга кўра, Ўзбекистон Республикасининг «Реклама тўғрисида»ги Қонуни 5-моддаси, 16-моддаси биринчи қисми ва Ўзбекистон Республикасининг «Истеъмолчилар ҳуқуқларини ҳимоя қилиш тўғрисида»ги Қонуни 6-моддаси биринчи қисми талаблари бузилиши аломатлари юзасидан «Anglesey Food» МЧЖга нисбатан белгиланган тартибда иш қўзғатилди», дейилади хабарда.

Аввалроқ, Рақобат қўмитаси Бухорода «электросеть» қўшиб ёзгани аниқлаб, корхонага нисбатан нисбатан иш қўзғатганди.