"Бугун эрталабдан сурхондарёлик қандайдир ўқимишли врачнинг ўз жиянининг аёли ва ёш болаларни уриб, уйдан ҳайдамоқчи бўлган видеоси таъбимни хира қилди. 

Кун шу кайфиятда бошланди.

Билмадим нима учун, бироқ эркак кишининг аёлга қўл кўтаришини кўриш жуда азобли. Ва афсуски бундай ҳодисалар ўтмишда қолиб кетгани йўқ, балки айни кунларда ҳам кўз ўнгимизда содир бўляпти.

Видеодаги ҳолат бўйича бугуноқ Ички ишлар вазирлигининг масъулларига чиқдим.

Уларнинг билдиришича, махсус ишчи гуруҳи ҳолатни ўрганишни бошлабди.

Интернет тармоқларида тарқалаётган видеодаги ҳолатдан келиб чиқиб, ҳуқуқни муҳофаза қилиш идоралари қуйидаги жиҳатларга албатта ҳуқуқий баҳо беришлари шарт, деб ҳисоблайман:

Биринчидан, ёши катта эркак (эркак номига номуносиб бўлса ҳам) аёл кишини ёш болалари кўз ўнгида калтаклаб тан жароҳати етказгани;

Иккинчидан, эркак кишининг ёш болаларнинг қорин соҳасига тепиб, уларни кўз ўнгида бола психологиясига салбий таъсир ўтказувчи ҳаракатлар содир этгани;

Учинчидан, ўша зўравон шахснинг ўз номига ўтказиб олган уй жой бўйича мавжуд ҳужжатларнинг асослилиги. Бунда Уй жой кодексига асосан болалари билан бирга шу уйда келин сифатида яшаб, уй жой қурган аёлнинг мулкдор сифатидаги ҳуқуқларига путур етган ёки етмагани;

Тўртинчидан, зўравон эркакнинг ўз жиянининг хотини ва онасини фоҳишаликда ошкора айблашида туҳмат ва ҳақорат элементларининг мавжуд ёки мавжуд эмаслиги;

Бешинчидан, ушбу эркакдан муттасил калтакланиб келган аёл ва унинг болалари ёрдам сўраб профилактика инспектори ва маҳалла раисига қилган мурожаатлари улар томонидан рад этиб келинганлигининг асослилиги.

Прокуратура органларидан ушбу воқеа бўйича батафсил маълумот ва зўравон эркакнинг ҳаракатлари бўйича кўрилган чоралар ҳақида ахборот кутамиз.

Йўқолсин бунақа эркаклар!" деб ёзади Олий Мажлис Қонунчилик палатаси депутати Расул Кушербаев.

Депутат бироздан сўнг ўз телеграм каналида бу ҳақида яна шундай пост қолдирди:

"Сурхондарёдаги аёлнинг калтакланиш ҳолати бўйича ИИБ томонидан суриштирув ҳаракатлари олиб борилмоқда экан.

Маълум бўлишича, ҳолат Денов туманида содир бўлган. Яъни тумандаги “И.Тураев” СИУ, “Буюк ипак йўли ” маҳалласида яшовчи Қ.С. 2021 йил 22 апрель куни вилоят ИИБ 102 рақамига қўшниси Х.Г. уриб тан жароҳати етказганлиги ҳақида мурожаати ва туман марказий касалхонасининг 25 апрелдаги хабарномаси навбатчилик қисмида қайд этилиб, ҳолат юзасидан суриштирув ҳаракатлари олиб борилмоқда. 

Суд-тиббиёт экспертизаси ўтказилганда фуқаро Қ.С. га “енгил тан жароҳати” етказилган, деб хулоса чиқарган.

Ҳолат юзасидан қўшимча ахборот берилар экан.

Умид қиламизки, барча ҳолатлар холис ўрганилиб, ҳаммасига тўғри ҳуқуқий бахо берилади".