2025 йил январь ойида Ўзбекистон бўйлаб 959 та йирик солиқ тўловчилар томонидан жами 8,5 триллион сўмдан ортиқ солиқ тўланган. Бу кўрсаткич мамлакат иқтисодиётида энг йирик корхоналар томонидан амалга оширилаётган тўловлар ҳажми ва уларнинг давлат бюджетига қўшаётган ҳиссасини акс эттиради.

Давлат улуши мавжуд ТОП-10 йирик солиқ тўловчилар умумий ҳисобда 4,5 триллион сўм солиқ тўлаган. Ушбу рейтингда «Навоий кон-металлургия комбинати» АЖ 2,08 триллион сўм солиқ тўлаб, биринчи ўринни эгаллаган. Иккинчи ўринда «Олмалиқ кон-металлургия комбинати» АЖ 639,1 миллиард сўм тўлов билан қайд этилган. «Ўзкимёсаноат» АЖ эса 388 миллиард сўм солиқ билан учинчи ўринни банд қилган. Шунингдек, «Ўзбекнефтгаз» АЖ (279,8 миллиард сўм), «Навоюран» АЖ (298,5 миллиард сўм) ва бошқа йирик давлат улушига эга корхоналар рўйхатда юқори ўринларни эгаллаган.

Хусусий сектордаги ТОП-10 йирик солиқ тўловчилар жами 1,3 триллион сўм солиқ тўлаган. Ушбу рўйхатда «UZBAT» АЖ ҚК 182 миллиард сўм солиқ билан биринчи ўринни эгаллаган. Иккинчи ўринни «ADM Jizzakh» МЧЖ (62,2 миллиард сўм) эгаллаган бўлса, учинчи ўринда «Epsilon Development Company» МЧЖ ХК 50,6 миллиард сўм солиқ билан қайд этилган. Шунингдек, «Капиталбанк» АТБ (48 миллиард сўм), «Unitel» МЧЖ ХК (47,6 миллиард сўм), «Tashkent Tobacco» МЧЖ (42,3 миллиард сўм) ва бошқа хусусий компаниялар ҳам йирик солиқ тўловчилар қаторидан жой олган.

Умуман олганда, ТОП-20 йирик солиқ тўловчилар мамлакат бўйлаб йирик солиқ тушумларининг 60 фоизини таъминлаган. Ушбу кўрсаткич йирик корхоналар томонидан давлат бюджетига қўшилаётган улкан ҳиссани акс эттириб, уларнинг иқтисодий барқарорликдаги ўрнини яна бир бор тасдиқлайди.