Фото: Reuters

Чоршанба куни Исроилнинг Ғазо секторига берган навбатдаги зарбалари оқибатида ҳалок бўлганлар сони 50 нафардан ошди. Бу ҳақда “Ал-Жазира” телеканали Фаластин тиббий манбаларига таяниб хабар тарқатди.

“Исроилнинг чоршанба куни эрталабдан Ғазога берган зарбалари оқибатида 56 киши ҳалок бўлди”, — дейилади манбада.

Аввалроқ, Ғазо сектори шимолидаги Жабалия шаҳри ва шу номдаги лагернинг бомбардимон қилиниши оқибатида 30 нафардан ортиқ одам ҳалок бўлгани хабар қилинганди.

Фаластин соғлиқни сақлаш вазирлиги статистик маълумотларига кўра, Исроил ўт очишни қайта бошлаганидан бери Ғазода 2700 нафардан ортиқ одам ҳалок бўлган, 7600 нафардан ортиқ одам тан жароҳати олган.

Шу йилнинг 18 мартга ўтар кечаси Исроил мудофаа кучлари Ғазо секторига зарбаларни қайта бошлади. Яҳудий давлат Бош вазири Бинямин Нетаньяҳунинг айтишича, ҳужумлар ҲАМАС ҳаракати АҚШнинг сулҳни узайтириш ва гаровга олинганларни озод қилиш режасини қабул қилишдан бош тортгани учун давом эттирилган.

Исроил ва ҲАМАС ўртасидаги ўт очишни тўхтатиш 1 март куни расман якунланганди. Бироқ воситачилар Ғазодаги келишув бўйича музокараларни давом эттиришга томонларни жалб қилишга уринишлари туфайли жанглар қайта бошланмай турганди. Шунга қарамай Исроил Стрипдаги тузсизлантириш заводига электр энергиясини етказиб беришни тўхтатди ва гуманитар ёрдам олиб келаётган юк машиналарига кириши учун йўлни ёпиб қўйди.