Сўнгги вақтларда ўзбекистонлик футболчилар тўп сураётган мамлакатлар рўйхати сезиларли даражада кенгайди. Бунга бир томондан футболчиларимиз кўрсатаётган сифатли футбол, бир томондан ҳукуматимиз томонидан олиб борилаётган оқилона ислоҳотлар сабаб бўлмоқда.

«Қизилқум», «Сурхон», «Андижон», «Қўқон-1912», ОКМК каби клублардаги фаолияти билан ўзбек футболи мухлисларига таниш бўлган Бахтиёр Қосимов 2025 йилнинг август ойида Ироқ Юлдузлар лигаси вакили «Аманат Бағдод» клубига кўчиб ўтганди. Ўтган вақт мобайнида Қосимов чиройли ўйинлари билан жамоа мухлислари ишонган футболчига айланиб келмоқда. У 2025 йилнинг 30 декабрь санасида бўлиб ўтган «Аманат Бағдод» ва мамлакатнинг амалдаги ғолиби «Ал-Шорта» жамоалари ўртасидаги ўйинда чемпион дарвозасига 2 та гол киритиб, жамоасига ғалаба келтирди.

Ўз навбатида «Халқ сўзи» сайти ушбу футболчи билан интервью ташкил этди. Унда Ироқ, у ердаги футбол ва бошқа масалалар ҳақида фикр юритилди. Қуйида ушбу интервьюни мутолаа қилишингиз мумкин.

Ассалому алайкум Бахтиёр. Бизга Ироқ чемпионатига кўчиб ўтишингиз ва бу таклиф қаердан келгани ҳақида гапириб бера оласизми?

— Ассалому алайкум сизга ва сиз орқали бутун ўзбек футболи мухлисларига. Ироқ чемпионатига келишимга Ҳамид Мерих сабабчи бўлди деб айта оламан. (Изоҳ: Ҳамид Мерих — эронлик футбол агенти. Жалолиддин Машарипов, Одил Ҳамробеков, Жамшид Искандаров, Абдувоҳид Неъматов ва бошқа қатор ўзбек футболи юлдузлари билан ишлаган ва ишлаб келмоқда). У менга Ироқ чемпионатидан қизиқиш борлигини айтди. Кўп ўйлаб ўтирмай унинг таклифини қабул қилдим. Боиси бу мамлакатда ўйнаш мен учун жуда қизиқ бўлди. Шунингдек, мен Ироққа келган биринчи ўзбек футболчиси бўлдим.

Ироқ ҳақида халқ орасида ҳар хил стереотип фикрлар ҳали ҳамон учрайди. Ҳарқалай яқин тарихда катта жанг майдонига айланган давлат. Ҳозирда бу мамлакатда яшаш даражаси қандай?

— Ҳа, тўғри. Ироқ деса кўпчиликнинг хаёлига уруш майдонига айланган мамлакат келади. Аммо, менга жамоага ўтишимдан олдин ҳозирда бу мамлакатда ҳаммаси жойида эканини айтишганди. Келиб бу нарсага ўзим ҳам амин бўлдим. Ҳозирда Ироқда тинчлик ҳукм сурмоқда. Барча нарса ҳукумат назорати остида.

Ироқ чемпионати ҳақида қандай фикрдасиз? Кўпчилик ўзбекистонлик мухлислар бу чемпионатга менсимайроқ қарайди. Аслида чемпионатнинг даражаси қандай? Ўзбекистон чемпионати ва Ироқ чемпионатини солиштира оласизми?

— Ироқ чемпионати ҳақида маълумоти йўқ одамлар кучсиз дейиши мумкин. Аслида Ўзбекистон Суперлигаси ва Ироқ Юлдузлари лигаси ўртасида катта фарқ йўқ. Бу ерда Юлдузлар лигасида 20 та жамоа ўйнайди ва ҳар бир ўйин қийин кечади. Ҳар икки чемпионатда ўйнаган футболчи сифатида Ўзбекистон ва Ироқ чемпионатини тенг деб баҳолаган бўлар эдим.

Ироқ чемпионати ўйинларига бўлган қизиқиш халқ орасида жуда юқори эканлиги ҳақида эшитдик. Бу ҳақда нима дея оласиз? Бу борада Ироқ биздан олдиндами?

— Ҳа, Ироқда футболга бўлган қизиқиш жуда юқори. Ҳар бир ўйинга ўртача 10 минг атрофида мухлис келади. Шунингдек, Ироқ медиасини бизникидан анча устунроқ деб айтган бўлар эдим.

«Ал-Шорта»га қарши ўйин ҳақида нималар дея оласиз? Ушбу жамоа мамлакатнинг амалдаги чемпиони эди. Сиз киритган 2 гол эвазига чемпион мағлуб этилди?

— Ҳа, унутилмас ўйин бўлди деб айта оламан. «Ал-Шорта» Ироқнинг энг кучли 3 та жамоасидан бири, мамлакатнинг амалдаги чемпиони. Халқаро мусобақаларда Ўзбекистон клублари билан ҳам доимо яхши ўйнаб келган. Бу ўйинда жамоам мен киритган 2 та гол эвазига ғалаба қозонди. Бундан жуда хурсандман.

Ироқ клублари молиявий жиҳатдан қандай ҳолатда? Ироқ чемпионатида футболчилар қанча маош олади?

— Ироқ клублари молиявий жиҳатдан жуда яхши ҳолатда. Аниқ рақамлар ҳақида гап кетса, шуни айта оламанки, бу мамлакатда йилига 1 миллион доллар маош оладиган футболчилар бор. Яхши биласизки, Ўзбекистон футболida бунча маош ҳозирда ҳеч қайси футболчига тўланмаяпти.

Мурод Бобожоновни сизинг жамоангизга ўтишида сизнинг қанчалик ҳиссангиз бўлди?

— Ҳозирда Ироқ клублари ўзбекистонлик футболчиларга жиддий қизиқиб қолишган. Мендан марказий ҳужумчи сўрашди. Мен ўтган мавсум «Хоразм»да 10 та гол киритган Мурод Бобожоновни таклиф қилдим. Клуб уни ўрганиб чиқди ва у билан шартнома имзоланди.

Бахтиёр, биз билан суҳбатлашганингиз учун жамоамиз номидан миннатдорчилик билдирамиз. Сизга келгуси фаолиятингизда улкан зафарлар тилаймиз.

— Сизга ҳам таклиф учун каттакон раҳмат.

Муҳаммадамин Зуҳриддинов суҳбатлашди.