Сунъий интеллект (СИ) моделлари турли хил мураккаб вазифаларни бажара олишига қарамай, оддий кўникмаларда ҳали ҳам қийинчиликларга дуч келмоқда. Эдинбург университети олимлари томонидан ўтказилган сўнгги тадқиқот шуни кўрсатдики, ҳатто илғор алгоритмлар ҳам аналог соатлардан вақтни аниқ ўқиш ва календарь бўйича ҳисоб-китоб қилишда кўплаб хатоларга йўл қўймоқда.

Тадқиқот давомида сунъий интеллект турли хил аналог соатларнинг суратларини таҳлил қилишга мажбур бўлди. Бу суратларда рим рақамлари, иккинчи стрелка бор ёки йўқлиги, рангли ва стандарт бўлмаган дизайнлар мавжуд эди. Шунга қарамасдан, энг мукаммал СИ моделлари ҳам соат стрелкаларининг жойлашишини фақат 25% ҳолатдагина тўғри аниқлай олди. Хусусан, рим рақамли циферблатлар ва ғайриоддий дизайнларга эга соатларда хатолар кўп кузатилди.

Тадқиқотчилар СИ моделларини календарь бўйича ҳисоб-китоб қилиш қобилиятига ҳам синовдан ўтказди. Унга турли сана, байрамлар ва вақт оралиқларини аниқлашга оид саволлар берилди. Энг илғор моделлар ҳам бундай тестларда 20% ҳолатда хато қилди. Хусусан, байрамлар ва сана орасидаги вақтни ҳисоблаш борасида муаммолар кўпроқ учради.

Мутахассисларнинг таъкидлашича, бундай хатоларнинг асосий сабаби сунъий интеллектнинг фақат тасвирни таниб олиш қобилиятига эга бўлиб, жисмларнинг фазовий жойлашувини тўлиқ тушуна олмаслигидадир. Соат ва календарь каби тизимларни тушуниш учун нафақат шаклни таниш, балки элементлар орасидаги математик боғлиқликни ҳисобга олиш ҳам зарур.

Олимлар бу муаммоларни ҳал қилиш учун сунъий интеллект алгоритмларини фазовий мулоҳаза юритиш ва мантиқий боғлиқликларни тўғри тушунишга йўналтириш кераклигини таъкидлашди. Ҳозирги кунда СИ моделлари кўплаб соҳаларда аниқ натижалар бермоқда, бироқ бундай оддий кўникмаларни ривожлантириш сунъий интеллектни янада мукаммал қилиш учун муҳим босқич бўлиши мумкин.