Кеча ижтимоий тармоқ саҳифаларида “Аввал оқдан қорани ажратиб олиш керак” сарлавҳаси остида ички ишлар органи ходими боғча болаларига тарбиявий соат ўтаётгани акс этган видео тарқалди.

Мазкур ҳолат юзасидан Тошкент шаҳар мактабгача ва мактаб таълими бошқармаси қуйидагиларни маълум қилади. Унга кўра, 2023 йил 17 июль куни Учтепа туманидаги давлат мактабгача таълим ташкилоти раҳбари томонидан туман ИИО ФМБ, мудофаа ишлари бўлими ҳамда “Фарҳод” маҳалла фуқаролар йиғини раиси номига ҳамкорликда “Ҳарбийлар билан учрашув” мавзусида профилактик тадбир ўтказиш юзасидан таклифнома юборилган.

Профилактика инспекторлари боғча тарбияланувчиларига Ватанга муҳаббат, ота-она қадри ва келажакда Ватанни қўриқлайдиган мард ўғлон ва қизлар бўлиб етишишлари, боғчадан нотаниш фуқаролар билан кетмаслиги, уйини бегона шахсларга очмаслик ҳақида суҳбат ўтказиб, ўзлари билан олиб келган китоб ва ўйинчоқларни боғча тарбияланувчиларига совға қилишган.

Тадбир тафсилотлари акс этган видеолавҳани гуруҳ тарбиячиси тарбияланувчилар ота-оналарини жамлаган телеграм гуруҳига ташлаб берган. Афсуски, айрим ота-оналар томонидан бу видео лавҳа бошқа гуруҳларга ташланиб, томошабинлар томонидан нотўғри талқин қилинганлиги ачинарлидир.