Жорий йилнинг 20-24 октябрь кунлари Ислом ҳамкорлик ташкилоти (ИҲТ) га аъзо давлатлар оммавий ахборот воситалари вакиллари ва блогерлари учун мамлакат бўйлаб инфо-тур ташкил этилди.

Туризм қўмитаси ва Ўзбекистоннинг ИҲТга аъзо давлатларидаги элчихоналари ёрдамида ташкил этилган инфо-турда 24 нафар нуфузли хорижий ОАВ вакиллари иштирок этишди.

Инфо-тур дастурига мувофиқ, хорижий медиа вакиллари Ўзбекистоннинг бир қатор тарихий ҳудудлари: Тошкент, Самарқанд, Бухоро, Хива шаҳарларида бўлиб, миллий ҳунармандчилиги, гастрономиясига ва “Хива — 2024 йилда Ислом дунёсининг туризм пойтахти” халқаро тадбирига тайёргарлик жараёнларига доир материаллар тайёрлаш ҳамда бу орқали мамлакатимизга ташриф буюрувчи сайёҳлар сонини ошириш мақсадида медиаконтентлар тайёрлашди.

Шу ўринда, Хива шаҳарининг халқаро жамиятдаги бу эътирофи -  ички ва ташқи туризмни ривожлантириш, янги инфратузилма объектлари, музей ва экспозициялар барпо этиш, сайёҳлик хизматлари экспорти ҳажмини ошириш имконини бермоқда. 

Шубҳасиз, йил бўйи давом этадиган маданий тадбирлар, хорижий ва маҳаллий журналистлар учун уюштириладиган медиатурлар нафақат шаҳарни, балки бутун мамлакатни дунё миқёсида янада кенг танитишга хизмат қилади. Жаҳон жамоатчилиги юртимиз тарихи, табиати, халқимиз турмуш тарзи ва маданияти, урф-одат ва анъаналари билан яқиндан танишиш имкониятига эга бўлади.