Фото: "Халқ сўзи"

Олий Мажлис Қонунчилик палатаси депутати Назир Сабировга шу йилнинг сентябрь ойида Бухоро вилояти Олот тумани “Мухтор” МФЙда яшовчи Ҳ.Имомов сайловчилар номидан ички йўлларни шағаллаштириш бўйича мурожаатнома йўллаган эди. Депутат масалани ўрганиб, тегишли идораларга чиқди. Натижада депутат аралашуви билан салкам бир миллиард сўм маблағ ажратилиб, ички йўлларга шағал тўкиш ишлари бошлаб юборилди.

– Ташвишларимизни енгиллаштиришда беминнат ёрдам кўрсатаётгани учун депутатимиздан миннатдормиз,– дейди Ҳ. Имомов. – Қишлоғимиздаги йўллар равон, ён-атроф обод бўлаётганига нима етсин?!

 Депутатнинг ўз сайловчилари билан бу галги учрашуви ҳам ишчанлик руҳида кечди. У Олот туманидаги 18-, 20-, 28- умумтаълим мактабларида бўлиб, таълим даргоҳларининг қиш мавсумига тайёргарлигини кўздан кечирди.”Човдир” маҳалла фуқаролар йиғинида қад ростлаган қишлоқ оилавий врачлик пункти фаолияти билан танишди. Депутатнинг бу ердаги сайловчилар билан учрашуви ҳам мазмунли ўтди. Гап шундаки, ўтган йилнинг декабридаги мулоқот чоғида аҳоли вакиллари қишлоқда шифо маскани йўқлигини айтиб, шу масала ечимида ёрдам сўрашган эди. Депутат ҳамда туман ҳокимлигининг саъй-ҳаракати билан бу ерда янги қишлоқ оилавий врачлик пункти биноси қурилди. Айни дамда йигирма нафарга яқин ходим меҳнат қилаётган шифо маскани замонавий тиббий  ускуналар билан жиҳозланган.

Депутат, шунингдек, “Яшил макон” умуммиллий дастури доирасида Олот туман тиббиёт бирлашмаси боғида ўтказилган кўчат экиш тадбирида қатнашди.

И. ИБРОҲИМОВ, “Халқ сўзи”.