Нечоғли ғайритабиий туюлмасин, Ғиждувондай салоҳияти юқори туманда шу пайтга қадар маданият маркази йўқ эди. Истиқлол байрами арафасида шу кемтиклик ўрни тўлдирилди. Туман марказидаги қадимий “Чорсу” маҳалласи ҳудудида икки қаватли кўркам бино қад ростлади.

— Давлатимиз раҳбарининг 2024 йил 31 май – 1 июнь кунлари вилоятимизга қилган ташрифи чоғида бир қатор иқтисодий-ижтимоий лойиҳаларни амалга ошириш, жумладан, Ғиждувонда замонавий маданият маркази барпо этиш юзасидан кўрсатма берилган эди, — дейди узоқ йиллар давомида шу соҳада ишлаб, обрў-эътибор топган меҳнат фахрийси Ражаб Авезов. — Буни қарангки, қисқа муддат ичида шундай кўркам иншоот қурилди. Орзуйимиз ушалди.

“Бухоро агрокластер” масъулияти чекланган жамияти томонидан 33 миллиард сўмдан зиёд маблағ эвазига бунёд қилинган масканда маданият ва санъат соҳасига меҳр қўйган ёшларнинг иқтидорини юзага чиқариш учун барча қулайлик яратилган. Бу ерда анъанавий хонандалик, чолғу асбоблари, рақс, драма тўгараклари фаолияти йўлга қўйилмоқда. Бино жами 70 та машғулот хонасидан иборат.

Маданият марказининг очилишига бағишлаб ўтказилган маросимда давлат ва жамоат ташкилотлари вакиллари қатнашиб, бу ерда яратилган шарт-шароитлар билан танишдилар.

Истам ИБРОҲИМОВ,

«Халқ сўзи».