Ҳуштак чалма, бақирма, қўй сўйма. Россия марказий осиёлик мигрантлар учун дастур ишлаб чиқди

Россия Миллатлар ишлари бўйича федерал агентлиги Марказий Осиёдан келган меҳнат муҳожирлари учун мослашув курси ишлаб чиқди. Ушбу лойиҳани «Коммерсант» нашри ўрганиб чиққан. Маълум бўлишича, курс 70 дақиқалик маъруза бўлиб, бу вақт ичида Россия Федерациясининг миграция ва меҳнат қонунчилиги ҳақида керакли маълумотларни ўрганиши керак бўлади.

Шунингдек, қўлланмада мигрантларга мамлакатда ўзини тутиш қоидаларини, жумладан, аёллар ҳамда эркакларга ҳуштакбозлик қилмаслик, ўткинчиларни она тилида муҳокама қилмаслик тавсиялари келтирилади. Бундан ташқари, чет элликларга тарих сабоқлари берилиб, СССР даврида Ўрта Осиё республикаларининг ривожланиши учун катта миқдорда пул сарфлангани уқтирилади.

Қўлланмада маърузачи қуроллари кучларда шартнома бўйича хизмат қилиш орқали Россия фуқаролигини соддалаштирилган тарзда олиш имкониятини эслатиб ўтиши керак.

Муаллифлар рус тилини билиш муҳимлигини таъкидлайдилар: «Руслар кўп миллатли халқ, лекин ҳамма рус тилида гапиради. «Ака» ёки «сингил» сўзлари билан қариндошингиз, танишингиз бўлмаган одамлар билан мулоқот қилиш мумкин эмас. Чет элликлар ўткинчиларни ўз она тилида муҳокама қилмасликлари, бошқа одамлар олдида ўз она тилида пичирлашмасликлари керак».

«Россия дунёвий давлат эканлигини ёдда тутиш керак. Россияда жамоат жойларида бирон бир динга муносабат билдириш, кўчада диний маросимларни ўтказиш, ҳайвонларни қурбонликка сўйиш, жамоат жойларида ибодат қилиш одат тусига кирмайди», дейилади маърузада.

Ушбу янгича тартибда айтилишича, Россиядаги аёллар анъанавий равишда очиқ кийим кийишади ва бу танишиш учун ишора эмас. Шунингдек, нотаниш аёллар ва эркакларга жисмонан тегишингиз, яъни тегиш, чимчилаш, қучоқлаш, қўлларидан ушлаш мумкин эмас. Бундай хатти-ҳаракатлар безорилик деб баҳоланиши мумкин. Бундан ташқари муҳожирлар аёл ёки эркакларнинг эътиборини жалб қилиш учун ҳуштак чалиши мумкин эмас.

Якуний қисм «Россия ва Марказий Осиё мамлакатлари ўртасидаги муносабатлар тарихи» га бағишланган. Унда Россия ва Марказий Осиёни боғлаб турган дўстлик ришталари кўп асрлик тарихга эгалиги тушунтирилади. Муаллифларнинг таъкидлашича, 19 асрда Ўрта Осиёнинг ерлари Россия империяси таркибига кириши ҳудуд иқтисодиётининг ривожланишига яхши таъсир кўрсатган. СССР ажратган пуллар Ўрта Осиё минтақаси давлатларининг муваффақиятига сабаб бўлган.

«Биз умумий тарихимизни, ғалаба ва мағлубиятларимизни унутмаслигимиз керак. Биз ёнма-ён курашдик ва нацизм каби даҳшатли глобал таҳдидга қарши курашда ғалаба қозондик. Агар биз бу алоқани давом эттира олсак, янада кучлироқ бўлишимиз мумкин», дейди маъруза муаллифлари.

Бироқ, курснинг амалий амалга оширилиши мутахассис учун бир қатор саволлар туғдиради. Унинг сўзларига кўра, ҳудудларда мигрантлар билан бундай машғулотларни кенг миқёсда ўтказа оладиган тузилмалар ва мутахассислар йўқ.

Макрон Атталнинг истеъфосини қабул қилди

Франция Президенти Эммануель Макрон Бош вазир Габриель Атталнинг истеъфосини қабул қилди, аммо ундан вақтинчалик лавозимда қолишини сўради.

Сешанба куни Елисей саройининг баёнотида айтилишича, у янги ҳукумат тайинлангунча фаолият юритади. Атталнинг муваққат ҳукумати жорий ишларни бошқариб туради. Бундан ташқари, у 26 июлда бошланадиган Олимпия ўйинларини назорат қилади.

Муваққат ҳукумат янги қонунларни парламентга тақдим эта олмайди ёки катта ўзгаришлар кирита олмайди.

Францияда аввал ҳам муваққат ҳукуматлар бўлган, аммо ҳеч бири бир неча кундан ортиқ қолмаган. Амалдаги ҳукумат қанча муддат қолиши мумкинлиги бўйича ҳеч қандай чекловлар йўқ. Парламент уни тарк этишга мажбур қила олмайди.

34 ёшли Аттал январь ойида Франция бош вазири этиб тайинланган эди. У COVID-19 пандемияси даврида машҳурликка эришди. Шунингдек, бош вазир бўлишдан олдин Франция таълим вазири бўлиб ҳам фаолият юритган.

Байден сайловдан чиқиш шартини айтди

АҚШ президенти Жо Байден агар шифокорлар унинг соғлиғида муаммо борлигини аниқласа, президентлик пойгасидан чиқишини таъкидлади.

«Менда қандайдир касаллик бўлса, шифокорлар келиб, сизда фалон муаммо бор дейишарди», деди у президентлик пойгасини тарк этиш ҳақида гапирар экан.

«Очиғини айтсам, менимча, қарилик фақат донолик келтиради», — дея қўшимча қилди Байден шу ўринда.

Байден аввалроқ, агар Худо буни буюрса, сайловолди пойгасидан чиқишини айтган эди.

Шу йилнинг 27 июнь куни Жоржия штатининг Атланта шаҳрида Байден ва унинг асосий сиёсий рақиби республикачи Доналд Трамп ўртасида теледебат бўлиб ўтди. CNN экспресс сўровига кўра, баҳсни томоша қилган томошабинларнинг учдан икки қисми Трамп ғалабасини қайд этган.

АҚШда президентлик сайловлари 5 ноябрь куни бўлиб ўтади. Иккинчи муддатга номзодини қўйган Байден Демократик партиядан етарли миқдордаги делегатнинг қўллаб-қувватлашига эришди.

Финляндия Россия чегарасида девор қурмоқда

Финляндия ҳукумати томонидан Финляндия ва Россия ўртасидаги чегарада девор қурилиши режа бўйича амалга оширилмоқда, дея хабар берди «Yle» жамоат телерадиокомпанияси.

«Шарқий чегара девори қурилиши режа асосида амалга оширилмоқда. Қурилиш август ойининг охирида Жанубий Карелия музофоти Нуйямаа аҳоли пунктида бошланади ва 70 километрни ташкил этади», дейилади манбада.

Деворнинг қурилиши аввал синов панжараларини қуриш билан бошланган эди. Лойиҳанинг тажриба босқичи доирасида Иматра шаҳри чеккасида уч километрга яқин панжара қурилди.

«Тажриба асосида, масалан, тўсиқлар тармоғи тузилишига, шунингдек, электр ва телекоммуникация кабелларини ётқизишга кичик ўзгартиришлар киритилди», дейди лойиҳа менежери Эркки Матилаинен.

ОАВнинг қўшимча қилишича, бу борадаги ишларнинг биринчи босқичи 2025 йилда тугатилади. Лойиҳанинг асосий қисми – 200 километрлик панжара 2026 йилнинг ёзигача қуриб битказилади. Панжара асосан жануби-шарқий чегарада, энг гавжум назорат пунктлари жойлашган жойда қурилади. Финляндия Россия билан 1300 километрлик чегаранинг бутун узунлиги бўйлаб панжара қуришни режалаштирмаган.

Финляндия 2023 йилнинг ноябрь ойидан бошлаб учинчи давлатлардан қочқинларнинг назоратсиз оқими фонида чегарани кесиб ўтишда чекловлар жорий қила бошлади. Финляндия расмийлари Россияни чегарага қасддан бошпана изловчиларни юборишда бир неча бор айблаган.

Россия ташқи ишлар вазирлигининг расмий вакили Мария Захарова Россияни Европа Иттифоқидаги миграция инқирозига алоқадорликдаги айбловларни рад этди ва буни Ғарбнинг икки томонлама стандартлари, деб атади.

Аввалроқ Россия президентининг матбуот котиби Дмитрий Песков Финляндиянинг Россия билан чегарадаги назорат-ўтказиш пунктларининг ёпилишини изоҳлар экан, қўшни давлат раҳбарлари ҳозир амал қила бошлаган русофоб позициясидан чуқур афсусда эканини таъкидлаган эди.

Ғазодаги бомбардимон қилинган мактаб

Исроил 10 кун ичида Ғазода БМТга қарашли 6-мактабни бомбардимон қилди. Оқибатда ўнлаб одамлар ҳалок бўлган.

Исроил кучлари Нусейратдаги Ал-Рози мактабига ҳамда Ал-Мавасидаги хавфсиз ҳудудга ҳужум қилиб, камида 42 фаластинликни ўлдирди. Фаластин расмийларига кўра, Исроил ҳарбийлари Ғазо секторида БМТ томонидан бошқариладиган яна бир мактабни ҳамда Исроил томонидан ишлаб чиқилган «хавфсиз ҳудуд»ни бомбардимон қилган.

Бирлашган Миллатлар Ташкилотининг Фаластинлик қочқинлар бўйича агентлиги Исроил қўшинлари ўтган октябрь ойида уруш бошланганидан бери Ғазодаги мактабларнинг қарийб 70 фоизига зарба берганини айтди. Ушбу мактабларнинг 95 фоизидан ортиғи зарба пайтида бошпана сифатида ишлатилган.