Фото: РИА Новости

Фолкленд ороллари яқинида Норвегиянинг «Argos Georgia» балиқчи кемаси чўкиб кетиши оқибатида уч нафар Россия фуқароси ҳалок бўлди. Бу ҳақда «РИА Новости» агентлигига Россия ташқи ишлар вазирлиги матбуот котиби Мария Захарова маълум қилди.

«Фолкленд қирғоқ қўриқлаш хизмати ва кема эгасининг маълумотларига кўра, бортда саккиз нафар россиялик бўлган. Улардан тўрт нафари омон қолган, уч нафари ҳалок бўлган, бир нафари бедарак йўқолганлар рўйхатига киритилган», — деди агентлик суҳбатдоши.

«Argos Georgia» душанба куни Фолкленд ороллари яқинида чўкиб кетди. НРК телерадиокомпанияси Қутқарувни бошқаришнинг бош марказига таяниб, кема Норвегиянинг «Ervik Havfiske» компаниясига тегишли бўлиб, Муқаддас Елена ороли байроғи остида ҳаракат қилган.

«EFE» ахборот агентлиги хабарига кўра, кема бортида жами 27 киши бўлган. Улардан ўн нафари Испания, саккиз нафари Россия, беш нафари Индонезия, икки нафари Уругвай ва икки нафари Перу фуқароси бўлган.

«Ervik Havfiske» ижрочи директори Стиг Эрвикнинг «РИА Новости»га маълум қилишича, 14 киши қутқариб олиниб, Фолкленд оролларига олиб кетилган. Тўққиз нафар денгизчининг жасади топилган, тўрт нафар экипаж аъзоси бедарак йўқолганлар рўйхатига киритилган. Қутқарувчилар қидирув ишларини олиб бормоқда.