Хелсинки ва Таллин шаҳарлари ўртасидаги сув ости телекоммуникация кабелига зарар етказганликда гумон қилинган кемани қўлга олди. Бу ҳақида BILD нашри маълум қилди.

Билдирилишича, Финляндиядаги алоқа оператори 2025 йил 31 декабрь куни тонгда Хелсинки ва Таллин шаҳарлари ўртасида жойлашган сув ости телекоммуникация кабелида носозлик аниқлангани ҳақида хабар берган. Мазкур маълумот зудлик билан Финляндия Чегара қўриқлаш хизматига етказилган ва текширув ишлари бошланган.

Текширувлар давомида кабелга етказилган зарар Эстониянинг эксклюзив иқтисодий зонаси ҳудудида содир этилгани аниқланган. Финляндия расмийларининг маълум қилишича, тез орада воқеага алоқадор бўлиши мумкин бўлган кема топилган. Патруль кемаси ва вертолёт томонидан у Финляндиянинг эксклюзив иқтисодий зонасида, лангар ташлаб турган ҳолда аниқланган. Соҳил қўриқлаш хизмати кемани назоратга олган, тергов ишлари эса Хелсинки полициясига топширилган.

Маълумот учун, ҳибсга олинган кема Цент-Винсент ва Гренадинлар байроғи остида сузиб юрувчи «Fitburg» кемаси ҳисобланади. У Истанбул шаҳрида рўйхатдан ўтган Туркиянинг «Albros Shipping & Trading» компаниясига тегишли бўлиб, Санкт-Петербургдан Исроилга йўл олган бўлган.

Ҳодиса юзасидан миллий ва халқаро даражада тергов ишлари олиб борилмоқда.