Бу йил Фарғона вилоятида “Бир маҳалла – бир маҳсулот” тамойили асосида етиштирилган маҳсулотларни Европа, Осиё ва араб давлатларига экспорт қилиш кўлами янада кенгайди.

Хусусан, Қува туманидаги “Quva Agro Star” МЧЖ яқинда халқаро сифат сертификатини қўлга киритиб, вилоятда етиштирилган қишлоқ хўжалиги маҳсулотларини Япония, Буюк Британияга экспорт қилишни йўлга қўйди. Ўз навбатида, яқинда фарғоналик тадбиркорлар ташаббуси билан БААнинг Дубай шаҳрида савдо уйи ташкил этилди. Натижада вилоятда етиштирилган мева-сабзавотларни араб давлатлари бозорлари ҳамда йирик савдо тармоқларига тизимли равишда етказиб бериш имконияти яратилди.

Шу йилнинг сентябрь ойида фарғоналик экспортёр корхоналар томонидан намуна сифатида етказилган узум япониялик харидорларга маъқул келиб, маҳсулот юқори баҳоланди. Бунинг самараси сифатида ушбу мамлакатга қиймати 1 миллион АҚШ доллари бўлган узум экспорти бўйича шартнома имзоланди.

Ўзаро келишувга кўра, сентябрь ойида етказиб берилган 1 тонна “Келин бармоқ”, “Қора кишмиш” навли узумлар Токио бозорларида қисқа муддатда харидоргир бўлиб улгурди. Шунингдек, анор ва хурмо Кунчиқар юртда истиқомат қилувчи харидорларга манзур бўлди.

— Айни жараёнда ўтган ойда ҳам буюртма асосида Япония пойтахти – Токио шаҳрига икки маротаба узум, анор ва хурмо меваси экспорт қилинди, — дейди “Quva Agro Star” МЧЖ раҳбари Шавкат Алиқулов. — Шу билан бирга, сентябрь-октябрь ойларида Буюк Британия компаниялари билан қатор онлайн мулоқотлар ўтказилиб, умумий қиймати 1 миллион долларлик мева-сабзавот маҳсулотлари етказиб бериш бўйича шартнома имзоланишига эришилди.

Шартнома доирасида Буюк Британия пойтахтига узум, анор, хурмо, беҳи, қовун ҳамда турли кўкатлар етказиб берилди. Таъкидлаш ўринлики, буюртмачилар томонидан экспорт қилинган маҳсулотлар сифати ва қадоқланиши тўлиқ халқаро стандартларга мос эканлиги эътироф этилди.

Ботир МАДИЁРОВ

(«Халқ сўзи»).