Кеча, 12 март куни Фарғона халқаро аэропортида Новосибирскдан S7-5561 рейси билан учган «S7 Airlines» (Россия) авиакомпаниясининг «Boeing 737-800» самолёти учиш-қўниш йўлагида қолиб кетди. Бу ҳақда «Авиаторщина» хабар берди.

Қайд этилишича, самолёт қўнгандан сўнг, учиш-қўниш йўлагида ҳаракатланиш вақтида ўнг асосий шассидаги ташқи ғилдирак чиқиб кетган. Экипаж командири самолётни тўхтатиб, муҳандис-техник ходимларни чақирган. Ҳаво кемасини кўздан кечириш чоғида ғилдиракни ушлаб турувчи мурватлардан бир қанчаси етишмаётгани аниқланган.

Шундан сўнг, йўловчилар учиш-қўниш йўлагига туширилиб, юклари билан бирга аэропорт терминалига етказилган. «Boeing 737» самолёти парвоздан четлатилган ва бир неча соатдан кейин перронга олиб борилган.

Таъкидланишича, Фарғона аэропорти ягона учиш-қўниш йўлаги тўсилиб қолгани сабабли вақтинча ёпилган. Шу сабабли Внуководан Фарғонага парвоз қилган «Utair» авиакомпаниясининг «Boeing 737» самолёти Тошкент аэропортига қўнишга мажбур бўлган.

Авиакомпания матбуот хизматига кўра, Новосибирскдан Ўзбекистонга қайтиш рейсини амалга ошириш учун захира самолёти юборилган.