Фото: NRC

АҚШ президенти Дональд Трамп Ғазо аҳолиси кўчирилишини айтгандан сўнг Малайзия Ташқи ишлар вазирлиги бунга қатъий қарши эканини маълум қилди. Малайзия фаластинликларнинг мажбурий кўчирилиши этник тозалаш ва халқаро ҳуқуқ, БМТнинг кўплаб резолюцияларини бузиш эканлигини эслатган.

«Фаластин халқининг ўз тақдирини ўзи белгилаш ҳуқуқини эътиборсиз қолдирадиган ва унинг эркинлигига тажовуз қилувчи ечимларни бир томонлама ва куч билан жорий этишга бўлган ҳар қандай уринишни қабул қилиб бўлмайди ҳамда минтақадаги энг узоқ давом этадиган можаролардан бирини янада чуқурлаштиради», — дейилади вазирлик баёнотида.

«Малайзия Фаластин халқи билан бирдамликда давом этмоқда. Яқин Шарқда мустаҳкам тинчлик ва барқарорликка эришишнинг ягона йўли 1967 йилгача бўлган чегараларга асосланган, пойтахти Шарқий Қуддус бўлган мустақил ва суверен Фаластин давлатини барпо этишдир», — дея қўшимча қилган вазирлик.

Аҳолисининг учдан икки қисми мусулмонлардан иборат бўлган Малайзия Исроил билан дипломатик алоқага эга эмас ва узоқ вақтдан бери Фаластин масаласини астойдил қўллаб-қувватлаб келади. Шунингдек, Исроилни БМТдан чиқариб юборишга чақирган. Мамлакат раҳбари Ғарбнинг Ғазони бошқараётган Фаластин гуруҳи ҲАМАС билан муносабатларни узиш бўйича босимини ҳам рад этди.

Трампнинг Ғазони қўлга киритиш тўғрисидаги баёнотидан сўнг турли давлатлар танқидий қарашларини эълон қилган. Кейинчалик АҚШ Давлат котиби Марко Рубио Ғазо қайта қурилаётган вақтда фаластинликларнинг вақтинчалик кўчирилишини таъкидлади.